جاركەنتتە ءبىر ميلليراد تەڭگەنىڭ مەكتەبى "قۇلاعالى" تۇر. الماتى وبلىسى پانفيلوۆ اۋدانى جاركەنت قالاسىنىڭ حامراەۆ اتىنداعى ورتا مەكتەپ وقۋشىلارىنىڭ اتا-انالارى الەمۋتتىك جەلىگە بەينەروليك جاريالاعانىن مالىمدەيدى “ادىرنا” ۇلتتىق پورتالى ratel.kz سايتىنا سىلتەمە جاساپ.
بەينەروليكتە تۇرعىندار مەكتەپ قابىرعاسىندا جارىقشاقتار پايدا بولعانى كورسەتىلگەن جانە بالالارىنىڭ قاۋىپسىزدىگىنە الاڭدايتىنىن ايتادى.
بىراق پانفيلوۆ اۋدانىنىڭ اكىمدىگى الاڭدايتىن ەشنارسە جوق دەيدى. ولاردىڭ سوزىنشە، مەكتەپتىڭ سىرتقى شتۋكاتۋركاسى قالىڭ جاسالعاندىقتان جارىقشاقتار پايدا بولعان. كوسمەتيكالىق جوندەۋ جۇمىستارىن جاساۋ ءۇشىن بيۋدجەتتەن 15 ميلليون تەڭگە قاراستىرىلعان.
«بۇل مەكتەپ 430 بالاعا ارنالعان. سمەتالىق قۇنى ءبىر ميلليارد تەڭگەدەن اسادى. كەپىلدىك مەرزىمى ءۇش جىل بولعان. عيماراتتى قابىلداعاندا بۇنداي ولقىلىقتار بولعان جوق. 2019 جىلى قابىرعالاردا جارىقشاقتار پايدا بولا باستادى. باقىلاۋشى ورگاندار تەكسەرۋ جۇرگىزدى. ولار شتۋكاتۋركا قالىڭ جاسالعانىن انىقتادى. بيىل شتۋكاتۋركا قۇلاي باستادى. كەپىلدىك مەرزىمى اياقتالاندىقتان بيۋدجەتتەن 15 ميلليون تەڭگە ءبولۋ قاراستىرىلعان»، - دەلىنگەن اۋداندىق اكىمدىك تاراتقان مالىمدەمەدە.
پانفيلوۆ اۋدانىنىڭ اكىمدىگى بەس جىل بۇرىن عانا سالىنعان جاڭا مەكتەپكە بيۋدجەتتەن ەندى 15 ميلليون تەڭگە جۇمسايتىندارىنا تەگى الاڭدامايتىنداي. ال ءوزىن قۇرىلىسشىمەن دەپ ايتقاندى ۇناتاتىن، ءارى وبلىستاعى ءار عيماراتتىڭ ساپاسىن قاتتى قاداعالايمىن دەۋدى جاقسى كورەتىن قۇرىلىسشى اكىم اماندىق باتالوۆ "قالىڭ بوپ كەتكەن سىلاققا" قاتىستى ەشتەڭە ايتقىسى كەلمەيتىندەي. جاڭا سالىنعان مەكتەپكە بيۋدجەتتەن 15 ميلليون تەڭگە ءبولۋدى دە وعاش سانامايتىنداي. ازىرگە ءۇنسىز. ءبىر ايتا كەتەرلىگى، قۇرىلىسشى اكىم باسقاراتىن الماتى وبلىسىندا ءالى دە ءۇش اۋىسىمدا ءبىلىم بەرىپ جاتقان مەكتەپتەر كوپ. ال جاڭا سالىنعان مەكتەپتەرى وسىلايشا كوپ ۇزاماي كۇردەلى جوندەۋگە سۇرانىپ تۇر.
ءبىر ميلليارد تەڭگە بيۋدجەت قارجىسى جۇمسالعان مەكتەپتى «الماتىكۋلتبىتستروي» كومپانياسى سالىپ، 2017 جىلى پايدالانۋعا بەرگەن. ونى جەرگىلىكتى بيلىك وكىلدەرى سالتاناتتى تۇردە لەنتاسىن قيعان.
