«قايتالاۋ ءىلىم اناسى» دەگەن ءسوز بار. بۇل تەك قانا ءبىلىم سالاسىنا ەمەس، كەز كەلگەن داعدىنى قايتالاۋعا ارنالعان ءسوز. ۇلى ءسوز. اسكەري سالا دا بۇل ءسوزدى ءوز ءپرينتسيپى ەتەدى. مىنە، سول ماقساتتا ۇنەمى اسكەري دايىندىقتار وتكىزىپ، ۇرىس جاعدايىنا دايىندىقتى پىسىقتاپ، قايتالاپ وتىرادى. مىسالى ناۋرىز-ماۋسىم ايلارىندا ەلىمىزدەگى بارلىق اسكەري بولىمشەلەر مەن اسكەري دايىندىق ورىندارىندا 3 مىڭعا جۋىق جاتتىعۋ ۇيىمداستىرىلعان. ونىڭ ىشىندە ءىرى اسكەري جاتتىعۋلار، كۇندەلىكتى اتىس جاتتىعۋلارى جانە تاعى باسقا اسكەري ءىس-قيمىلدار بار.
شىلدە ايىندا دا بۇل جاتتىعۋلار ءوز جالعاسىن تاپتى. 23-شىلدە كۇنى قورعانىس مينيسترلىگىندە قورعانىس ءمينيسترىنىڭ ءبىرىنشى ورىنباسارى - قازاقستان رەسپۋبليكاسى قارۋلى كۇشتەرى باس شتابىنىڭ باستىعى، گەنەرال-لەيتەنانت مۇرات بەكتانوۆتىڭ باسشىلىعىمەن كەزدەسۋ ءوتتى. سەلەكتورلىق رەجيمدە قارۋلى كۇشتەر قىزمەتتەرىنىڭ باس قولباسشىلارى، قارۋلى كۇشتەر فيليالدارىنىڭ قولباسشىلارى مەن ايماقتىق قولباسشىلىق اسكەرلەرى، قۇرىلىمدىق بولىمشەلەردىڭ باسشىلارى جاۋىنگەرلىك دايىندىق بارىسى تۋرالى حابارلادى.
كوۆيدقا قارسى شارالاردى دا اسكەردە جۇرگىزۋ ماڭىزدى. سەبەبى ساۋ جاۋىنگەر تىنىش مەملەكەت پەن بەرىك شەكارا دەگەن ءسوز. قازىرگى ۋاقىتتا قازاقستاننىڭ قارۋلى كۇشتەرى COVID-19-قا قارسى ءىس-شارالاردى جۇزەگە اسىرۋدى جالعاستىرۋدا. اسكەري بولىمدەر مەن مەكەمەلەر قاجەتتى قورعانىس قۇرالدارىمەن جانە مەديتسينالىق قۇرالدارمەن قامتاماسىز ەتىلگەن، ەپيدەمياعا قارسى جانە سانيتارلىق-پروفيلاكتيكالىق شارالار قولدانىلادى. ۆاكتسيناتسيا جالعاسۋدا. ۆاكتسينانىڭ ءبىرىنشى كومپونەنتىن پەرسونالدىڭ 99 پايىزى قابىلدادى، ەكىنشىسىنە 92 پايىز ۆاكتسينا ەگىلدى.
سانيتارلىق-ەپيدەميولوگيالىق شارالار مەن كارانتيندىك تالاپتاردىڭ قاتاڭ ساقتالۋىنا قاراماستان، جازعى دايىندىق كەزەڭىنىڭ ەسەپتى كەزەڭىنە ارنالعان جاۋىنگەرلىك دايىندىق شارالارى تولىق كولەمدە جۇرگىزىلدى. جاۋىنگەرلىك دايىندىقتىڭ نەگىزگى مىندەتتەرى اسكەرلەردىڭ جاۋىنگەرلىك دايىندىق دەڭگەيى مەن جاۋىنگەرلىك تيىمدىلىگىن ارتتىرۋ جانە قاۋىپسىزدىك شارالارىن قاتاڭ ساقتاۋ بولىپ وتىر.
5000-نان استام اتىس جىتتىعۋى، ونىڭ ىشىندە 1500-دەن استامى تۇندە ءوتتى. اسكەري قىزمەتشىلەر 2 مىڭعا جۋىق پاراشيۋتپەن سەكىرۋدى ىسكە اسىردىع سونىمەن قاتار 40-تان استام دالالىق ايماقتا ۇرىس جۇرگىزۋ جاتتىعۋلارى ءوتتى. بۇلاردىڭ قاتارىنا 13 جاياۋ مارش پەن 10-نان استام ۇرىس قيمىلدارىن قوسىڭىز. اسكەري ۇشقىشتار 100-گە جۋىق ۇشۋ جاتتىعۋلارىن، ال تەڭىز ماتروستارىن 200-دەن استام كەمە جاتتىعۋلارىن جاسادى. بۇنىڭ بارلىعى دەرلىك جاۋىنگەرلەردىڭ اسكەري قابىلەتىن ارتتىرىپ، شىنىقتىرادى.
گەنەرال-لەيتەنانت مۇرات بەكتانوۆ قورعانىس مينيسترلىگى اسكەري-اۋە كۇشتەرى مەن اۋە شابۋىلىنا قارسى قورعانىس ماماندارىنىڭ ۇشۋ ساپاسىن جانە تەحنيكالىق دايىندىعىن ارتتىرۋعا ەرەكشە نازار اۋداراتىنىن ەسكە سالدى. جىل سايىن اسكەري كادرلاردى دايارلاۋدىڭ فورمالارى مەن ادىستەرى، بولىمشەلەردى، اسكەري بولىمدەردى ۇيلەستىرۋ جەتىلدىرىلۋدە. ۆزۆودتار مەن روتا كومانديرلەرىنىڭ ادىستەمەلىك ساۋاتتىلىعىنا باسا نازار اۋدارىلىپ كەلەدى.
قارۋلى كۇشتەردە 30 مىڭنان استام مامان ءوز ماماندىعى بويىنشا دايارلىقتان ءوتتى. ساپالى وقىتۋ ءۇشىن 2600-دەن استام وقۋ توبى قۇرىلدى، ءتيىستى ادىستەمەلىك دايارلىعى بار تاجىريبەلى نۇسقاۋشىلار انىقتالدى. بۇل ارەكەتتىڭ ءبارى ءبىزدىڭ جاۋىنگەرلەرىمىزدى سىن ساعاتتا قۇرىشتاي ەتىپ، ەل قورعانى جاسايتىنى انىق.
"ادىرنا" ۇلتتىق پورتالى
