ماڭعىستاۋدا ەل تاۋەلسىزدىگىنىڭ 30 جىلدىعى اياسىندا «قايىرىمدى ىستەر مارافونى» جالپى ۇلتتىق جوباسى جۇزەگە اسىرىلىپ كەلەدى. بۇل تۋرالى قوعامدىق كوممۋنيكاتسيا ورتالىعىندا وتكەن بريفينگتە ماڭعىستاۋ وبلىستىق ىشكى ساياسات باسقارما باسشىسىنىڭ ورىنباسارى باتىرحان قۋانىشبەكوۆ ءمالىم ەتتى، دەپ حابارلايدى "ادىرنا" ۇلتتىق پورتالى ماڭعىستاۋ وبلىسى قوعامدىق كوممۋنيكاتسيا ورتالىعىنا سىلتەمە جاساپ.
ونىڭ ايتۋىنشا، اتالعان جوبانىڭ باستى ماقساتى - ەل تۇرعىندارىن ىزگىلىككە، مەيىرىمدىلىككە ۇندەپ، قايىرىمدى ىستەر جاساۋعا شاقىرۋ.
«قايىرىمدى ىستەر مارافونى» جوباسى باستاۋ العاننان رامازان ايىندا 5 مىڭعا جۋىق وتباسىعا كومەك كورسەتىلدى. جالپى وبلىس بويىنشا 2021 جىلدىڭ قانتار – ماۋسىم ايلارىندا 40 مىڭنان استام ادامدى قامتي وتىرىپ، مۇقتاج جاندارعا كومەك كورسەتىلدى. 1 ناۋرىز – «العىس ايتۋ كۇنىنە» وراي، وبلىسىمىزدا 100-گە جۋىق مەرەكەلىك جانە قايىرىمدىلىق شارالار ۇيىمداستىرىلدى. وبلىس اكىمىنىڭ باستاماسىمەن، ناۋرىز ايىنىڭ 1 مەن 31 ارالىعىندا «مىڭ العىس!» قايىرىمدىلىق اكتسياسى ءوتتى. اكتسيا اياسىندا وبلىس بويىنشا از قامتىلعان 1000 وتباسىعا ازىق – تۇلىك قورجىندارى تاراتىلدى»، - دەدى باتىرحان قۋانىشبەكوۆ.
سونداي-اق، اقتاۋ قالاسى اكىمدىگىنىڭ قولداۋىمەن كوپ قاباتتى تۇرعىن ۇيلەردە قۇرىلىس مەكەمەلەرىنىڭ دەمەۋشىلىگىمەن رەسپۋبليكاعا جانە وڭىرگە تانىمال كورنەكتى ازاماتتارعا ارنالىپ 10 مۋرال سالىندى. اتاپ ايتقاندا زامانىمىزدىڭ زاڭعار جازۋشىلارى ءابىش كەكىلباەۆ، ەسەنعالي راۋشانوۆ، فاريزا وڭعارسىنوۆا، كەڭەس وداعىنىڭ باتىرلارى ءاليا مولداعۇلوۆا، مانشۇك مامەتوۆا، حيۋاز دوسپانوۆا، بوكسشىلار شوقىر بولتەكۇلى، الەكساندر دراچتىڭ بەينەسى سالىندى.
مەتسەناتتاردىڭ كومەگىمەن اقتاۋ قالاسىنىڭ 3 شاعىن اۋدانىنان «سۇڭقار» سپورت كەشەنى سالىنىپ، قازىرگى تاڭدا 500 بالا سپورتپەن تۇراقتى شۇعىلدانۋعا مۇمكىندىك جاسالعان. ءساۋىر ايىندا تۇششىقۇدىق اۋىلىندا دەمەۋشىلەردىڭ كومەگىمەن اۋىل ورتالىعىنا اشىق بالالار ويىن الاڭى سالىندى.
«سونىمەن قوسا جىڭعىلدى، قىزان، جارمىش اۋىلىنىڭ مەكتەپ تۇلەكتەرىنىڭ دەمەۋشىلىگىمەن اۋىلداردىڭ كىرەبەرىسىنە ينستاللياتسيا ورناتىپ، اباتتاندىرۋ جۇمىستارى جۇرگىزىلدى. قازاقستان حالقىنىڭ بىرلىگى كۇنى قارسانىندا اقشۇقىر اۋىلىندا كوپ سالالى «سۇلەيمەن پروموۋشن» سپورت كەشەنى دەمەۋشىلەردىڭ كومەگىمەن اشىلدى. وندا 500 بالا كۇرەس، بوكس، گيمناستيكا، سۋعا ءجۇزۋ سياقتى سپورتتىڭ بىرنەشە تۇرىمەن اينالىسۋعا مۇمكىندىك جاسالعان. جەتىباي اۋىلىنان ءداستۇرلى ساداق اتۋدى دارىپتەۋ ماقساتىندا مەتسەناتتاردىڭ قولداۋىمەن «ساداق اتۋ» زالى اشىلىپ، حالىق يگىلىگىنە پايدالانۋعا بەرىلدى. اقپان ايىندا مۇنايلى اۋدانىنىڭ ورتالىعىندا «ميعراج» مەشىتىنىڭ جانىنان دەمەۋشىلەردىڭ كومەگىمەن سپورت كەشەنى پايدالانۋعا بەرىلدى. بەينەۋ اۋدانىنىڭ 2011 جىلعى مەكتەپ تۇلەكتەرى رامازان ايىندا يگى ىسكە سەبەپكەر بولىپ، اۋدانداعى كوپ بالالى وتباسىعا ءۇي تارتۋ ەتتى»، - دەدى باتىرحان قۋانىشبەكوۆ.
"ادىرنا" ۇلتتىق پورتالى
