اتىراۋ وبلىسىندا مەديا جانە اقپاراتتىق ساۋاتتىلىققا ارنالعان «MediaLitFest» ءبىرىنشى ونلاين-فەستيۆالى رەسمي تۇردە ءوز جۇمىسىن باستادى.
العاش بولىپ حالەل دوسمۇحامەدوۆ اتىنداعى اتىراۋ ۋنيۆەرسيتەتىنىڭ ليايليا قويشىعۇلوۆا قۇتتىقتاۋ ءسوز الىپ، ۇيىمداستىرۋشىلار مەن قاتىسۋشىلارعا ساتتىلىك تىلەدى. ال، شارا بارىسىن اتالعان ۋنيۆەرسيتەتتىڭ جۋرناليستيكا كافەدراسىنىڭ مەڭگەرۋشىسى مəنشۇك مۇقاشەۆا جۇرگىزىپ وتىردى.
– قازىرگى قوعامداعى مەدياساۋاتتىلىقتى ارتتىرۋ قاجەتتىلىگى بار ەكەندىگىن ەسكەرسەك، بۇل جوبا وزەكتى ەكەندىگى راس. مەدياساۋاتتىلىقتىڭ جوقتىعى اقپاراتتى تۇتىنۋ بارىسىندا اقپاراتتىق تەڭگەرىمسىزدىكتى تۋدىرادى: سانانى ۋلاۋ، قاۋەسەتتەرگە سەندىرۋ، جالعان اقپارات تاراتۋ، ادامداردىڭ فاكتىگە سۇيەنگەن دەرەكتەر مەن اقپارات كوزىن تابا الماۋى جانە تاعى باسقا. كارانتين جاعدايىندا كوپتەگەن ادام ينتەرنەت رەسۋرسى ارقىلى ءبىلىم الۋعا، اقپارات الۋعا داعدىلاندى. الايدا، ينتەرنەتتە كونتەنت جاساۋ مەن ونى ورنالاستىرۋدىڭ جاپپاي قولجەتىمدىلىگى ونىڭ ساپاسى مەن شىنايلىعىنا كەپىلدىك بەرمەيدى. سوندىقتان اقپارات اعىندارىن باسقارۋ، وعان بەيىمدەلۋ جانە وزىنە قاجەتسىز اقپاراتتاردان اۋلاق بولۋ بىلىگى سىندى مەدياساۋاتتىلىق ماسەلەلەرى – بۇگىنگى قوعامنىڭ الدىندا تۇرعان ماڭىزدى قاجەتتىلىكتەردىڭ ءبىرى، – دەگەن ويىمەن ءبولىستى جۋىردا عانا «كىتاپ مادەنيەتىنە قوسقان ۇلەسى ءۇشىن» مەدالىن يەلەنگەن، ۋنيۆەرسيتەتتىڭ جۋرناليستيكا كافەدراسىنىڭ مەڭگەرۋشىسى مəنشۇك مۇقاشەۆا.
اتىراۋدا العاش رەت ءوتىپ جاتقان شارانى ۇيىمداستىرۋشىلاردىڭ ءبىرى تاتيانا گولۋبتسوۆا مۇنداي مول مۇمكىندىكتى جىبەرىپ الماۋ قاجەتتىگىن العا تارتادى.
– ءار قالانىڭ ءوز قۇپياسى مەن ەرەكشەلىگى بار، – دەيدى ول. – مەنىڭ ءبىر بايقاعانىم، اتىراۋ وتە مۋزىكالىق جانە شىعارماشىلىق قالا. بۇل فەستيۆالدىڭ «مەديا» دەپ اتالۋى دا تەگىن ەمەس. ونىڭ وزگەلەردەن ەرەكشەلىگى سول، مۇندا دىبىس، بەينە، قوزعالىستاعى سۋرەت، ونەردىڭ سان الۋان قىرى قامتىلعان. جۋرناليستيكا مەن الەۋمەتتىك جەلىلەر دە مەدياكەڭىستىكتىڭ ءبىر بولشەگى بولىپ تابىلادى. مەدياجۋرناليستيكا بايىرعى جۋرناليستيكا نەگىزدەرىن ونەر ەلەمەنتتەرىمەن بايلانىستىرا تۇسەدى. ياعني، بۇل شارادا جۋرناليست بولعىسى كەلەتىن جاندار ءان، اۋەن، كينو ارقىلى دا شابىت الادى، قاناتتانادى. بۇل جوبا ورتالىقتاندىرىلعان «MediaCAMP» باعدارلاماسى شەڭبەرىندە جاسالعان. ونى حالىقارالىق دامۋ بويىنشا اقش اگەنتتىگىنىڭ (USAID) دەمەۋشىلىگىمەن «Internews» جۇيەلى جۇزەگە اسىرىپ كەلەدى.
