تسوي: قازاقستاندا حالىقتىڭ 71,5%-ى ۆاكتسيناتسيالاندى

3121
Adyrna.kz Telegram

قر پرەمەر-ءمينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا COVID-19 اۋرۋى بويىنشا سانيتارلىق-ەپيدەميولوگيالىق جاعداي تۋرالى ماسەلە قارالدى. قازاقستاندا كوروناۆيرۋس ينفەكتسياسىمەن كۇرەسۋ بويىنشا قابىلدانىپ جاتقان شارالار تۋرالى دەنساۋلىق ساقتاۋ ءمينيسترى الەكسەي تسوي باياندادى، دەپ حابارلايدى "ادىرنا" ۇلتتىق پورتالى.

ءمينيستردىڭ ايتۋىنشا، الەمدە COVID-19-بەن اۋرۋ جانە ءولىم-ءجىتىم بويىنشا جاعداي تۇراقسىز.

جالپى الەمدە كۆي-مەن اۋىرۋدىڭ 224 ملن-نان استام جاعدايى تىركەلگەن، تاۋلىگىنە 300 مىڭنان استام جاعداي تىركەلگەن. 4,6 ملن استام ادام قايتىس بولدى. ددۇ ەۋروپالىق ايماعىنىڭ دەرەكتەرى بويىنشا سوڭعى ەكى اپتادا 54 ەلدەن 26 ەلدە سىرقاتتانۋشىلىقتىڭ ءوسۋى بايقالادى.

- سوڭعى 7 كۇندە اۋرۋدىڭ ەڭ كوپ ءوسۋى ۆەنگريادا بايقالدى، وندا ءبىر اپتا ىشىندە اۋىرۋ 100%-دان استام ءوستى، ۋكراينادا، پولشا مەن مولدوۆادا 60%-دان 80%-عا دەيىن، اۆستريادا، گەرمانيادا جانە بەلارۋستە 30%-دان 50%-عا دەيىن، چەرنوگوريادا، ارمەنيادا جانە يزرايلدە 8%-دان 20%-عا دەيىن»، — دەدى ا. تسوي. ونىڭ ايتۋىنشا، اۋىرۋدىڭ ءوسۋى يسپانيادا 60%-عا، فرانتسيادا 40%-عا، گرۋزيادا 39%-عا، ازەربايجاندا 16%-عا، يتاليادا 13%-عا، شۆەيتساريادا 12%-عا جانە رەسەيدە 9%-عا تومەندەدى، دەلىنگەن primeminister.kz سايتىندا.

قازاقستاندا سوڭعى ەكى اپتادا اۋرۋشاڭدىقتىڭ ءوسۋى 35%-عا تومەندەدى. سوڭعى اپتادا رەسپۋبليكا بويىنشا سىرقاتتانۋشىلىق دەڭگەيى اپتاسىنا 31 مىڭنان 25 مىڭعا دەيىن 14%-عا تومەندەدى.

- ددسۇ باعالاۋى بويىنشا، قازاقستاندا رەپرودۋكتيۆتى سان سوڭعى ءتورت اپتا ىشىندە ءبىر ساننان تومەن، بۇل پاندەميا باقىلاۋدا ەكەنىن جانە سىرقاتتانۋشىلىقتىڭ تۇراقتى تومەندەگەنىن كورسەتەدى، — دەپ اتاپ ءوتتى تسوي.

بۇگىنگى تاڭدا، ءمينيستردىڭ ايتۋىنشا، ءبىرىنشى كومپونەنتپەن 7,1 ملن استام ادام ەگىلدى، ەكپە الۋعا جاتاتىن حالىقتى قامتۋ 71,5% قۇرادى، ەكىنشى كومپونەنتتى 5,9 ملن استام ادام الدى، ەكپە الۋعا جاتاتىن حالىقتىڭ شامامەن 60%-ى قامتىلدى. وڭىرلەر ۆاكتسينامەن جەتكىلىكتى مولشەردە قامتاماسىز ەتىلگەن. ۆاكتسينالاردى جەتكىزۋ كەستەگە سايكەس جۇزەگە اسىرىلادى.

ءسوز سوڭىندا: "ۆاكتسينالاۋ ءالى كۇنگە دەيىن كوروناۆيرۋس ينفەكتسياسىنىڭ الدىن-الۋدىڭ جالعىز ناقتى شاراسى بولىپ قالىپ وتىر. سوندىقتان ءاربىر قازاقستاندىقتى ۆاكتسينا الۋعا جانە ەلىمىزدە ۇجىمدىق يممۋنيتەتتى قالىپتاستىرۋعا ءوز ۇلەسىن قوسۋعا شاقىرامىن!" — دەپ مالىمدەدى تسوي.

"ادىرنا" ۇلتتىق پورتالى

پىكىرلەر