ساپيەۆ،ارتاەۆ،ىبىرايىموۆتارعا ءومىر بويى اي سايىن 300 مىڭ تەڭگەدەن تولەنەدى

9653
Adyrna.kz Telegram

سپورتشىلار مەن جاتتىقتىرۋشىلارعا ءومىر بويى اي سايىنعى ماتەريالدىق قامسىزداندىرۋدى تولەۋ قاعيدالارىن بەكىتۋ تۋرالى ۇكىمەتتىڭ جاڭا قاۋلىسى شىقتى، دەپ حابارلايدى “ادىرنا” ۇلتتىق پورتالى Express Qazaqstan. سايتىنا سىلتەمە جاساپ.

ەندى سپورتشىلار مەن جاتتىقتىرۋشىلارعا ءومىر بويى اي سايىنعى ماتەريالدىق قامسىزداندىرۋ مىناداي مولشەردە تولەنەدى:

1). وليمپيادا، پاراليمپيادا جانە سۋردليمپيادا ويىندارىنىڭ چەمپيوندارى مەن جۇلدەگەرلەرى جانە (نەمەسە) سپورتتىڭ وليمپيادالىق تۇرلەرى بويىنشا الەم چەمپيوندارى اتاقتارىن جەڭىپ العان سپورتشىلارعا — 100 ايلىق ەسەپتىك كورسەتكىش ( 2021 جىل بويىنشا — 291 700 تەڭگە);

2). وليمپيادا، پاراليمپيادا جانە سۋردليمپيادا ويىندارىنىڭ چەمپيوندارى جانە جۇلدەگەرلەرى، جانە (نەمەسە) سپورتتىڭ وليمپيادالىق تۇرلەرى بويىنشا الەم چەمپيوندارى اتاقتارىن جەڭىپ العان سپورتشىلاردى دايىنداعان جاتتىقتىرۋشىلارعا — 100 ايلىق ەسەپتىك كورسەتكىش.

قازىرگى ۋاقىتتا سپورتشىلار مەن جاتتىقتىرۋشىلارعا اي سايىنعى ماتەريالدىق قولداۋعا ارنالعان تولەمدەردىڭ كولەمى — 101 898 مىڭ تەڭگەنى قۇرايدى.

ۇكىمەت مەملەكەت باسشىسىنىڭ 2021 جىلعى 1 قىركۇيەكتەگى قازاقستان حالقىنا جولداۋىنداعى "كاسىپقوي سپورتتى باسقارۋ جۇيەسىن قايتا قاراۋ بويىنشا ۇسىنىستار تۇجىرىمداۋ" دەگەن تاپسىرماسىن ورىنداۋ ماقساتىندا وسى قاۋلىنى ازىرلەگەن.

جوعارى سپورتتىق ناتيجەگە جەتۋ ءۇشىن الەمدىك تاجىريبەنى ەسكەرە وتىرىپ، سپورتشى، جاتتىقتىرۋشى مارتەبەسىن كوتەرىپ، ماتەريالدىق قولداۋ قاجەت.مىسالى، رەسەيدە سپورتشىلار مەن جاتتىقتىرۋشىلارعا الەۋمەتتىك قولداۋ ايىنا 60 000 رۋبل مولشەرىندە بەلگىلەنگەن، — دەلىنگەن ۇكىمەتتىڭ قاۋلىسىندا.

بۇل شامامەن 352 000 تەڭگەنى قۇرايدى ەكەن.

قازاقستاندا قازىر 1 ايلىق ەسەپتىك كورسەتكىش 2 917 تەڭگە بولسا، جاڭا جىلدان باستاپ، 3 063 تەڭگە بولادى. ياعني قۇجات قابىلدانعان سوڭ، چەمپيوندارعا اي سايىن 300 مىڭنىڭ ۇستىندە تولەماقى تولەنەدى.

دوپينگ داۋىنان كەيىن جاڭارتىلعان تىزىمگە سايكەس، قازاقستان جازعى وليمپيادا ويىندارىنان 15 التىن، 21 كۇمىس، 36 قولا مەدال ەنشىلىگەن. بارلىعى 72 مەدال. ال قىسقى وليمپيادا ويىندارىندا 1 التىن، 3 كۇمىس، 4 قولا مەدال العانبىز. ال پاراليمپيادا ويىدارىنان 9 مەدال (2 التىن، 5 كۇمىس، 2 قولا) بار. ودان بولەك، الەم چەمپيوندارى مەن جۇلدەگەرلەرى دە جەتەرلىك.

الداعى ۋاقىتتا ۆاسيلي جيروۆ، ەرماحان ىبىرايىموۆ، باقتيار ارتاەۆ، سەرىك ساپيەۆ جانە باسقا دا چەمپيوندار مەن جۇلدەگەرلەرگە تولەنەتىن قارجى كوبەيەدى.

قۇجاتتىڭ تولىق ءماتىنى "اشىق نقا" پورتالىندا جاريالاندى. قوعامدىق تالقىلاۋ 14 قازانعا دەيىن جالعاسادى.

”ادىرنا” ۇلتتىق پورتالى

پىكىرلەر