جۇمىرتقا باعاسى 70 تەڭگەگە دەيىن ءوسۋى مۇمكىن

2921
Adyrna.kz Telegram

كەلەر جىلدان باستاپ جۇمىرتقا باعاسى 70 تەڭگەگە دەيىن ءوسۋى مۇمكىن دەپ حابارلايدى "ادىرنا" ۇلتتىق پورتالى "31 ارناعا" سىلتەمە جاساپ.

ويتكەنى كەلەر جىلدان باستاپ ۇكىمەت جۇمىرتقانىڭ باعاسىن ەركىن اينالىمعا جىبەرەدى. سونداي-اق، وسى ۋاقىتقا دەيىن مەملەكەتتەن جۇمىرتقا وندىرىسىنە بەرىلىپ كەلگەن سۋبسيديا تولىعىمەن توقتاتىلادى.

سولتۇستىك قازاقستان وبلىسىندا سۋبسيدياسىز ء"ومىر سۇرە المايتىنىن" مالىمدەگەن قۇس فابريكالارىنىڭ قوجايىندارى ەندى باعانى ەكى ەسەگە دەيىن كوتەرۋگە ءماجبۇر بولاتىنىن ايتىپ وتىر.

سولتۇستىكتەگى 35 قۇس فابريكاسىنىڭ تەك بەسەۋى عانا جۇمىرتقا وندىرۋمەن اينالىسادى. كاسىپكەرلەر قۇس ءوسىرىپ، جۇمىرتقا شىعارۋدىڭ شىعىنى كوپ بولاتىنىن ايتادى. ماسەلەن، بيىلدىڭ وزىندە جەم-ازىق ەكى ەسەگە قىمباتتاپ، جانارماي باعاسى 1,5 ەسەگە كوتەرىلگەن.

"قازىر جۇمىرتقانىڭ ءبىر داناسىنىڭ باعاسى 35 تەڭگەدەن باستالادى. ال سۋبسيديانى الىپ تاستاسا، ونى كەم دەگەندە 50 تەڭگەدەن ساتامىز", – دەيدى قۇس فابريكاسى ديرەكتورىنىڭ ورىنباسارى الەكساندر چەسنوكوۆ.

بۇعان دەيىن مەملەكەت قۇس فابريكالارىنا ءبىر دانا جۇمىرتقاعا ءۇش تەڭگە سۋبسيديا تولەسە، بىلتىردان بەرى ونى 2 ەسەگە قىسقارتىپ تاستاعان. 2022 جىلدان باستاپ جۇمىرتقا ءوندىرىسى ءۇشىن سۋبسيديا مۇلدە تولەنبەيدى. سەبەبى، قازاقستاندا جۇمىرتقا تۇتىنۋ بويىنشا سۇرانىستان ۇسىنىس كولەمى ارتىپ وتىر. ال سۋبسيديا ەندى قازاقستان ءوزىن ءوزى تولىق قامتاماسىز ەتە الماي وتىرعان تاۋارلارعا عانا تولەنبەك.

"اۋىل شارۋاشىلىعى مينيسترلىگىنىڭ ەرەجەسىنە وزگەرىس ەنگىزىلمەسە، ەندىگى جىلدان باستاپ جۇمىرتقاعا سۋبسيديا تولەمەيمىز. جۇمىرتقا باعاسىن ەركىن اينالىمعا جىبەرەمىز. بۇدان بىلاي باعانى نارىق ءوزى رەتتەۋى ءتيىس", – دەدى سقو اۋىل شارۋاشىلىعى باسقارماسىنىڭ ءبولىم باسشىسى جاسۇلان ۋاليبەكوۆ.

 

"ادىرنا" ۇلتتىق پورتالى.

پىكىرلەر