ادىلەت راحمەتوللا-ينستاگرامدا تانىمال ۆيدەوبلوگەر. 1992 جىلى جامبىل وبلىسى، قورداي اۋدانى، كەنەن ازىرباەۆ اۋىلىندا دۇنيەگە كەلگەن. وتباسىندا اتاسى، اكەسى، اكەسىنىڭ اعاسى ۆيدەو تۇسىرۋمەن اينالىساتىن بولعان. سول كىسىلەردىڭ ۆيدەو تۇسىرگەنىنە قاراپ، ءوزى دە وسى ىسكە ۇلكەن قىزىعۋشىلىق تانىتا باستاعان. الماتى قالاسىنا ق.ساتپاەۆ اتىنداعى قازاق ۇلتتىق تەحنيكالىق ۋنيۆەرسيتەتىنە وقۋعا تۇسسە دە، ستۋديالاردا فوتوگراف رەتىندە جۇمىس ىستەگەن. قازاقستان ۇلتتتىق ارناسىندا، «Hit Tv»، «اسىل ارنا» تەلەارنالارىندا وپەراتور رەتىندە قىزمەت اتقارعان. كەيىن ءوز-وزىنە جۇمىس جاساۋدى ءجون كورەدى. قازىر درون ۇشىرىپ، قازاقستاننىڭ كوز تارتار ادەمى جەرلەرىن ۆيدەوعا ءتۇسىرىپ، ونى ادامدارمەن بولىسەدى. سوندىقتان ونى «دروننىڭ اتاسى» دەپ تە اتايدى.
-ۆيدەوگرافتىڭ تالانتى نەمەن ولشەنەدى دەپ ويلايسىز؟ كوزقاراسپەن بە، ويمەن بە، الدە قابىلداۋمەن بە؟
-ءار ادام ءوز جۇمىسىن جاقسى كورسە، ول داياشى نەمەسە ەتىكشى بولسا دا، قارجىگەر بولسا دا سول ءىستىڭ جەمىسىن جەيتىنى انىق.
-ءسىز ادەمى، كورىكتى جەرلەردى تۇسىرەتىنىڭىزدى بىلەمىز. ءسىز ءبىر لوكاتسيانى الدىن-الا جوسپارلاپ بارىپ تۇسىرەسىز بە، الدە كورگەن ساتتە لەزدە ءتۇسىرىپ الاسىز با؟
-كەيدە جوسپارسىز تۇسىرىلىمدەر بولادى. جاڭبىر جاۋىپ، بۇلتتار تومەن ۇشىپ، كۇننىڭ باستىسى، تاڭنىڭ اتقانى ادەمى بولىپ تۇراتىن كەزدەر بولادى. كۇزدىڭ وزىندىك ادەمىلىگى بار. قىستا العاش قار جاۋعان كەزدە، اياز بولىپ قار قىراۋلانعان ساتتە وتە ادەمى بولادى. مامىر ايىنىڭ سوڭىنا قاراي قىزعالداقتار شىعىپ وڭتۇستىك قۇلپىرادى. سونداي كورىنىستەردى ءدال ۋاقىتىندا ءتۇسىرىپ ۇلگەرۋگە تىرىسامىن. كەيدە جوسپارلاپ بارعان جەر مەن ويلاعانداي ادەمى بولماي قالىپ جاتاتىن ساتتەر بولادى. ال مۇلدە جوسپارلاماعان جەرلەر قاراساڭ كوز تويماستاي سۇلۋ بولىپ شىعادى. سوندىقتان قانداي جاعداي بولسا دا ءساتتى كادر الۋعا تىرىسامىن.
-قاي جىل مەزگىلىن تۇسىرگەندى ۇناتاسىز؟
-ماعان شىنى كەرەك، بارلىق جىل مەزگىلى ۇنايدى. ءار جىل مەزگىلىنىڭ وزىندىك تارتىمدىلىعى بار. بىراق جاقسى كوڭىل-كۇي سىيلايتىن كوكتەم مەزگىلى شىعار. قىستان شىققان سوڭ، ەنەرگياعا تولىپ، جادىراپ جۇرەتىندىكتەن كوكتەم ءسال كوبىرەك ۇنايدى.
-ءتۇسىرىلىم بارىسىندا قانداي قىزىقتار بولىپ تۇرادى؟
- ساپار بارىسىندا ءارتۇرلى قيىندىقتار بولادى. تاۋعا بارساڭ تۇنگە قالىپ قوياسىڭ. ال تاۋدا تۇنگە قالۋعا بولمايدى. اداساسىڭ، جەلى ۇستامايدى. سونداي سيتۋاتسيالارعا تاپ بولىپ قالعان جاعدايدا، شىعاتىن جول ىزدەۋ كەرەك. سول ماڭايداعى ادامدارمەن سويلەسىپ ۇيرەنۋ كەرەك.
«مەن ءۇشىن بارلىعى ادامگەرشىلىكپەن ولشەنەدى. ادام قانشا جەردەن كاسىبي مامان بولسا دا،ورتاعا ەڭ الدىمەن مىنەز-قۇلقىمەن سىيادى. كينو الەمىنە وتسەم ەكەن دەگەن ارمانىم بار. ادامدارعا بار جاقسىلىقتى ناسيحاتتايتىن، اتا-انانى سىيلاۋدى، دوسقا ادال بولۋدى ۇيرەتەتىن كينو تۇسىرگىم كەلەدى. ومىردە شىنايى جولمەن جەتىستىككە جەتكەن ادامنىڭ ءومىرىن كورسەتكىم كەلەدى. وعان دا ءبىر كۇنى جەتەرمىن.
جاس ۆيدەوگرافتارعا ايتارىم بىردەن اقشانىڭ سوڭىنان جۇگىرمەۋ كەرەك.جارتى جىل بولسا دا تەگىن جۇمىس ىستەپ كورۋ كەرەك. تاجىريبە جيناۋ كەرەك. سەن قانشالىقتى تاجىريبەلى مامان بولاسىڭ، اقشا سەنىڭ ارتىڭنان جۇگىرەدى. سەنىڭ ساپالى مامان ەكەنىڭدى كورگەن جان ارقاشان اقىسىن تولەۋگە دايىن بولادى»-دەيدى ءسوز سوڭىندا ادىلەت.
سۇحباتتى دايىنداعان جاينا مولداعالي
"ادىرنا" ۇلتتىق پورتالى
