بۇل تۋرالى پارلامەنت سەنات توراعاسى ماۋلەن اشىمباەۆ "تاۋەلسىزدىك ۇرپاقتارى» رەسپۋبليكالىق جاستار فورۋمىندا ايتتى، دەپ حابارلايدى «ادىرنا» ءتىلشىسى baq.kz-كە سىلتەمە جاساپ.
بيىل - ءبىز ءۇشىن قاستەرلى جىل. تاۋەلسىزدىگىمىزگە 30 جىل تولىپ وتىر. بۇل وتكەنىمىزدى وي ەلەگىنەن وتكىزىپ، الداعى باعىت-باعدارىمىزدى انىقتايتىن ماڭىزدى مەجە. ەندى ساناۋلى كۇندەردەن كەيىن تۇڭعىش پرەزيدەنت كۇنىن دە اتاپ وتەمىز. بۇل كۇن ەلدىك پەن ەركىندىكتىڭ نىشانىنا اينالعان ايتۋلى مەيرام. ءبىز بۇگىن وسىنداي ۇلىق مەرەكەلەر قارساڭىندا ناعىز تاريحي ءساتتىڭ الدىندا جينالىپ وتىرمىز،-دەدى اشىمباەۆ.
سەنات توراعاسى اتاپ وتكەندەي، ەگەمەندىكتىڭ 30 جىلدىعى جەڭىس پەن جەتىستىككە تولى مەرەيلى بەلەس بولدى.
وسى ۋاقىتتا قازاقستان تاۋەلسىز ەل رەتىندە تولىق قالىپتاستى. ەلباسى نۇرسۇلتان نازارباەۆتىڭ ستراتەگيالىق ساياساتى ارقاسىندا بارلىق وزەكتى ماسەلە وڭ شەشىمىن تاپتى. شەكارامىز شەگەندەلدى، ەكونوميكامىز جۇيەلەندى. سىرتقى ساياساتىمىز سىندارلى جولعا ءتۇستى. 30 جىلدىڭ ىشىندە الەۋسەتتىك باعىتتا كوپتەگەن باعدارلاما ناتيجەلى ىسكە استى،- دەدى ماۋلەن اشىمباەۆ.
سەنات توراعاسى حالىقتى باسپانامەن قامتۋ بويىنشا دا اۋقىمدى جۇمىس اتقارىلعانىن ايتتى.
ميلليونداعان شارشى مەتر تۇرعىن ءۇي سالىندى. وسى باعىتتا نۇر-سۇلتان،الماتى، شىمكەنت قالالارىندا تىڭ باعدارلامالار قولعا الىنىپ، بىرقاتار جاس باسپانالى بولدى. تەك سوڭعى 3 جىلدىڭ ىشىندە اتالعان ءۇش قالادا جۇمىس ىستەيتىن جاستاردى باسپانامەن قامتۋعا 21 ملرد تەڭگە ءبولىندى، - دەدى ماۋلەن اشىمباەۆ.
«ادىرنا» ۇلتتىق پورتالى
