كوروناۆيرۋستىڭ "وميكرون" شتاممى جاھاندىق قاۋىپ بولىپ تابىلادى جانە بۇل ۆيرۋستى جۇقتىرۋ جاعدايلارىنىڭ سانى ارتادى، دەپ مالىمدەدى قاسىم-جومارت توقاەۆ. بۇل تۋرالى "ادىرنا" ۇلتتىق پورتالى حابارلايدى.
مەملەكەت باسشىسى دۇنيەجۇزىلىك دەنساۋلىق ساقتاۋ ۇيىمىنىڭ ارنايى سەسسياسىنىڭ اشىلۋ سالتاناتىندا ءسوز سويلەدى.
- بۇكىل الەمدە تەز تارالا باستاعان كوروناۆيرۋستىڭ جاڭا نۇسقاسىنا بايلانىستى الداعى اپتالاردا COVID-19 اۋرۋىن جۇقتىرۋ جاعدايلارى ارتادى. وميكرون شتامىن وڭتۇستىك افريكا رەسپۋبليكاسىنىڭ زەرتتەۋشىلەرى انىقتادى جانە بۇل جاڭا جاھاندىق قاۋىپ بولىپ تابىلادى، – دەدى توقاەۆ.
ونىڭ ايتۋىنشا، پاندەميا حالىقارالىق ىنتىماقتاستىقتاعى كوپتەگەن كەمشىلىكتەردى كورسەتتى.
- داعدارىستىڭ الەۋمەتتىك-ەكونوميكالىق سالدارى بارلىق دەڭگەيدەگى الەۋمەتتىك ءوزارا ءىس-قيمىلدى قايتا قاراۋعا اكەلدى. پاندەميا ىنتىماقتاستىققا نەگىزدەلگەن جاڭا جاھاندىق كوزقاراس پەن بيولوگيالىق سىن-قاتەرلەردى ەڭسەرۋدىڭ ءتيىمدى جۇيەسى قاجەت ەكەنىن راستادى، - دەدى قازاقستان رەسپۋبليكاسىنىڭ پرەزيدەنتى.كەيىنىرەك قر باسشىسى دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس ادحانوم گەبرەيۋسپەن كەزدەسكەنى بەلگىلى بولدى. توقاەۆ گەبرەيەسۋستى قازاقستانداعى COVID-19-عا قارسى ءىس-قيمىل شارالارىمەن تانىستىردى، حالىقتى ۆاكتسيناتسيالاۋ جانە قازاقستاندىق عالىمداردىڭ كوروناۆيرۋسقا قارسى پرەپاراتتاردى ازىرلەۋى تۋرالى ايتتى. پرەزيدەنت ددسۇ باسشىسىن قازاقستاندىق QazVac ۆاكتسيناسى تۋرالى حاباردار ەتتى. سونداي-اق، ول QazVac-تى مۇقتاج ەلدەرگە بەرۋگە دايىن ەكەنىن ءبىلدىردى.
"ادىرنا" ۇلتتىق پورتالى
