الەمدىك سپورتتا قازاقستاننىڭ تولقۇجاتىنا اينالعان «Astana Qazaqstan Team» ۆەلوكومانداسى تاعى ءبىر شاباندوزبەن تولىقتى.
بىرقاتار كوشباسشىلارىن كەرى قايتارعان «Astana Qazaqstan Team» كومانداسى الەمدىك ۆەلودودالاردا جىلداعى جەتىستىكتەرىن جاڭعىرتۋعا تىرىسىپ كورمەك.
الداعى ماۋسىمدا جاڭا قۇراممەن ونەر كورسەتەتىن ەلوردالىق ۆەلوۇجىم ساپىندا قازاقستاننىڭ 23 جاسقا دەيىنگى چەمپيونى نۇربەرگەن نۇرلىحاسىم دا جارىس جولىنا شىعاتىنى ايقىندالدى.
ەندەشە، «ادىرنا» ۇلتتىق پورتالىنىڭ ءتىلشىسى «Astana Qazaqstan Team» كومانداسىنىڭ ەڭ جاس ۆەلوشاباندوزى نۇربەرگەن نۇرلىحاسىممەن سۇحباتتاسقان بولاتىن. سونى نازارلارىڭىزعا ۇسىنامىز:
– 21 جاستا بولساڭداعى ەۋروپالىق بەدەلدى جارىستاردا ايتارلىقتاي تاجىريبە جيناقتاپ ۇلگەردىڭ. ءتىپتى الەكساندر ۆينوكۋروۆتىڭ دا كوزىنە ءتۇسىپسىڭ. قاتەلەسپەسەم، بۇل سەنىڭ العاشقى كاسىبي كەلىسىمشارتىڭ. مانسابىڭنىڭ جاڭا تاراۋىنا دايىنسىڭ با؟
– سپورتتىق مانسابىمدا العا ۇلكەن قادام جاساعانىما وتە قۋانىشتىمىن. ءبىراز تولقىپ تۇرمىن. جاستار اراسىندا ماۋسىمدى جاقسى وتكىزدىم. بىراق الەمدىك تۋردا مۇلدە باسقا دەڭگەي، باسقا دايىندىق، باسقا ماقساتتار ەكەنىن جاقسى تۇسىنەمىن. وسىنداي مۇمكىندىك بەرگەن الەكساندر ۆينوكۋروۆقا العىس بىلدىرەمىن جانە ماعان ارتىلعان سەنىمدى اقتاۋ ءۇشىن بار كۇشىمدى سالۋعا تىرىسامىن. مانسابىمنىڭ جاڭا تاراۋى باستالدى. ءبارى ويداعىداي بولادى دەپ ۇمىتتەنەمىن.
– قازاق ۆەلوسپورتىنىڭ قازىرگى جاعدايىنا كوڭىلىڭ تولادى ما؟
– مەنىڭ ويىمشا، ەلىمىزدە ۆەلوسپورت قارقىندى دامىپ كەلەدى. كاسىبي دەڭگەيدە عانا ەمەس، الماتى، شىمكەنت جانە تاراز سىندى ءىرى قالالاردا دا اتالعان سپورت تۇرىمەن شۇعىلداناتىندار قاتارى ارتقان. اسىرەسە، اۋەسقويلار اراسىندا جاقسى دامىعان. ءتىپتى ورتالىق ازيا بويىنشا الدىڭعى قاتاردامىز دەۋگە بولادى. سەبەبى قازاقستاننان ۆينوكۋروۆ، لۋتسەنكو سياقتى داڭقتى ۆەلوشاباندوزدار شىققان. ءبىز ولارعا ۇقساۋعا تىرىسامىز. ويتكەنى ولاردىڭ بويىنان جەڭىمپازعا لايىق قاسيەتتەردىڭ ءبارى تابىلادى.
– «بالتيك-كاركونشە تۋرى» (2019) كەزەڭىندە 4-ورىن، «تۋر دە دمز» (2017) ۆەلودوداسىندا جالپى ەسەپتە 9-ورىن. «Astana Qazaqstan Team» ساپىندا قانداي ناتيجەلەرگە جەتۋدى كوزدەپ وتىرسىڭ؟
– ناتيجەلەرگە كەلەر بولساق، مەن وزىمە ماقسات قويدىم. كەم دەگەندە ۇزدىك ۇشتىككە ەنۋ. بىراق الەمدىك ساناتتا ەمەس. ءبارىن ۋاقىت كورسەتەدى.
– ءوزىڭنىڭ العاشقى باپكەرىڭ مەن ۆەلوۇجىمىڭ جايلى بىرەر اۋىز سوزبەن سۇحباتىمىزدى تامامداساق؟!
– ەڭ الدىمەن العاشقى باپكەرىم ۆياچەسلاۆ نەپومنياششيحكە جانە الەكساندر شۋشەموين باسقاراتىن «Vino – Astana Motors» كومانداسىنىڭ باپكەرلەر شتابىنا العىس ايتقىم كەلەدى. قازىرگى جاتتىقتىرۋشىم الەكساندر شەپەر. ول وتە بىلىكتى باپكەر. سونداي-اق ول ۆەلوشاباندوزداردىڭ ءار ارەكەتىن سەزىنە بىلەدى. مەن جاتتىقتىرۋشىلار قۇرامىنا ريزامىن.
«استانا» كاسىبي سپورت كلۋبىنىڭ باس سەرىكتەسى – «سامۇرىق-قازىنا» ۇاق» اق، قۇرىلتايشىسى – تۋريزم يندۋسترياسى مەن سپورتتى قولداۋ قورى
ورالباي مەرگەنبايۇلى
