پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين قازاقستاندا نەسيەنى كوپ الاتىن ازاماتتاردىڭ تابىسى جاقسى دەپ سانايدى. بۇل تۋرالى ول ءماجىلىس دالىزىندە جۋرناليستەرگە بەرگەن جاۋابىندا ايتتى، دەپ حابارلايدى "ادىرنا" ۇلتتىق پورتالى Dalanews.kz-كە سىلتەپ.
جۋرناليستەر تۇرعىنداردىڭ كوپشىلىگى نەسيەگە تاۋەلدى بولىپ، ءتىپتى ءدارى-دارمەككە دەيىن ءبولىپ تولەۋ ارقىلى الۋعا ءماجبۇر ەكەنىن العا تارتتى. ال جۇمانعارين بۇل پىكىرمەن كەلىسپەيتىنىن ءبىلدىرىپ، نەسيەنى "اقىلمەن الاتىنداردىڭ" تابىسى جوعارى ەكەنىن ايتتى.
"جالپى نەسيە الاتىن ادامدى اقىلدى ادام دەپ سانايمىن. ەگەر ادام كوپ نەسيە الىپ جاتسا، دەمەك ونى تولەيتىندەي جاقسى تابىس تابادى دەگەن ءسوز. ال ەندى ءدارى-دارمەكتى ءبولىپ تولەۋگە الۋعا قاتىستى ايتسام، مۇنداي جاعداي ويلانۋعا تۇرارلىق. قازاقستاندا كەپىلدەندىرىلگەن تەگىن مەديتسينالىق كومەك شەڭبەرىندە 12 ميلليون ادام ءدارى-دارمەكتى تەگىن الادى. ولاردى Kaspi Red ارقىلى نەسيەگە الۋدىڭ قاجەتى جوق قوي. دارىگەرگە بارىپ، رەتسەپت الىپ، تەگىن الۋعا بولادى. بالكىم، اڭگىمە باسقا، وتە سيرەك كەزدەسەتىن نەمەسە بىزدە تەگىن بەرىلمەيتىن دارىلەر تۋرالى شىعار. بىراق بۇل دا الەۋمەتتىك سالاعا قاتىستى ماسەلە، ونى دا قاراستىرىپ جاتىرمىز", – دەدى سەرىك جۇمانعارين.
ءمينيستردىڭ ايتۋىنشا، مىندەتتى الەۋمەتتىك مەديتسينالىق ساقتاندىرۋ جۇيەسىنە قاتىسۋشى قازاقستاندىقتار كوپتەگەن ءدارىنى تەگىن الۋعا قۇقىلى.
ء"بىرىنشى دارىگەرگە بارۋ كەرەك، ءدارى تەگىن بەرىلە مە، بەرىلمەي مە، انىقتاپ العان ءجون. ەگەر راسىمەن قاجەت ءدارى تەگىن بەرىلمەسە، باسقا شەشىمىن ىزدەۋگە بولادى. بىراق نەسيە العاندا اركىم ءوزى جاقسىلاپ ويلانۋعا ءتيىس", – دەدى ول.
