«قازاقستان تەمىر جولى» ۇلتتىق كومپانياسىنىڭ باسقارما توراعاسى بولىپ تالعات الدىبەرگەنوۆ تاعايىندالدى، دەپ حابارلايدى "ادىرنا" ۇلتتىق پورتالى قازتاگ اگەنتتىگىنە سىلتەپ.
بۇل تۋرالى «سامۇرىق-قازىنا» قورىنىڭ باسشىسى نۇرلان جاقىپوۆ ۇلتتىق كومپانيا ۇجىمىنا تانىستىرۋ بارىسىندا ءمالىم ەتتى. تالعات ساعيۇلى الدىبەرگەنوۆ بۇعان دەيىن «قتج» باسقارما توراعاسىنىڭ ورىنباسارى قىزمەتىن اتقارعان.
ۇلتتىق كومپانيانىڭ مالىمەتىنشە، الدىبەرگەنوۆتىڭ تەمىرجول سالاسىندا 35 جىلدان استام تاجىريبەسى بار. ول الماتى تەمىرجول كولىگى ينجەنەرلەرى ينستيتۋتىن «تەمىرجول كولىگىندەگى تاسىمالدى ۇيىمداستىرۋ جانە باسقارۋ» ماماندىعى بويىنشا ۇزدىك بىتىرگەن. سونىمەن قاتار رەسەي پرەزيدەنتى جانىنداعى حالىق شارۋاشىلىعى جانە مەملەكەتتىك قىزمەت اكادەمياسىنىڭ ەكونوميكا ماگيسترى (قىزىل ديپلوم) جانە ەكونوميكا عىلىمدارىنىڭ كانديداتى دارەجەسى بار.
2024 جىلدان بەرى الدىبەرگەنوۆ «قتج» باسقارما توراعاسىنىڭ ورىنباسارى قىزمەتىن اتقارسا، بۇعان دەيىنگى جىلدارى بىرقاتار ءىرى كومپانيالاردا باسشىلىق قىزمەتتەردە بولعان. اتاپ ايتقاندا، 2008-2019 جىلدارى «كەدەنترانسسەرۆيس» اق پرەزيدەنتى، «اۆتوگازالماتى» جشس باس ديرەكتورى، «Kazakhmys Maker» جشس باسقارما توراعاسى قىزمەتتەرىن اتقارعان. 1998-2007 جىلدارى ول «قازاقستان تەمىر جولى» كومپانياسىنىڭ اقتوبە فيليالىن، «كازترانسسەرۆيس» مەملەكەتتىك كاسىپورنىن جانە «قازمۇنايگاز» ساۋدا ءۇيىنىڭ كولىك لوگيستيكاسى دەپارتامەنتىن باسقارعان.
ايتا كەتەيىك، قتج-نى 2021 جىلدىڭ ساۋىرىنەن باستاپ باسقارعان نۇرلان ساۋرانباەۆ جۋىردا قر كولىك ءمينيسترى بولىپ تاعايىندالعان ەدى. بۇعان دەيىن مەملەكەت باسشىسى قاسىم-جومارت توقاەۆ ەكس-مينيستر مارات قاراباەۆقا جۇمىستاعى كەمشىلىكتەرى ءۇشىن سوگىس جاريالاپ، قىزمەتىنەن بوساتقان بولاتىن.
