«Qazaqstan temır joly» ūlttyq kompaniiasynyŋ basqarma töraǧasy bolyp Talǧat Aldybergenov taǧaiyndaldy, dep habarlaidy "Adyrna" ūlttyq portaly QazTAG agenttıgıne sıltep.
Būl turaly «Samūryq-Qazyna» qorynyŋ basşysy Nūrlan Jaqypov ūlttyq kompaniia ūjymyna tanystyru barysynda mälım ettı. Talǧat Saǧiūly Aldybergenov būǧan deiın «QTJ» basqarma töraǧasynyŋ orynbasary qyzmetın atqarǧan.
Ūlttyq kompaniianyŋ mälımetınşe, Aldybergenovtıŋ temırjol salasynda 35 jyldan astam täjıribesı bar. Ol Almaty temırjol kölıgı injenerlerı institutyn «Temırjol kölıgındegı tasymaldy ūiymdastyru jäne basqaru» mamandyǧy boiynşa üzdık bıtırgen. Sonymen qatar Resei prezidentı janyndaǧy halyq şaruaşylyǧy jäne memlekettık qyzmet akademiiasynyŋ ekonomika magistrı (qyzyl diplom) jäne ekonomika ǧylymdarynyŋ kandidaty därejesı bar.
2024 jyldan berı Aldybergenov «QTJ» basqarma töraǧasynyŋ orynbasary qyzmetın atqarsa, būǧan deiıngı jyldary bırqatar ırı kompaniialarda basşylyq qyzmetterde bolǧan. Atap aitqanda, 2008-2019 jyldary «Kedentransservis» AQ prezidentı, «AvtoGazAlmaty» JŞS bas direktory, «Kazakhmys Maker» JŞS basqarma töraǧasy qyzmetterın atqarǧan. 1998-2007 jyldary ol «Qazaqstan temır joly» kompaniiasynyŋ Aqtöbe filialyn, «Kaztransservis» memlekettık käsıpornyn jäne «QazMūnaiGaz» sauda üiınıŋ kölık logistikasy departamentın basqarǧan.
Aita keteiık, QTJ-ny 2021 jyldyŋ säuırınen bastap basqarǧan Nūrlan Sauranbaev juyrda QR Kölık ministrı bolyp taǧaiyndalǧan edı. Būǧan deiın memleket basşysy Qasym-Jomart Toqaev eks-ministr Marat Qarabaevqa jūmystaǧy kemşılıkterı üşın sögıs jariialap, qyzmetınen bosatqan bolatyn.
