«Qazaqstan injiniring» R&D ortalyǧy» satylymǧa şyǧaryldy. Būl turaly «Qazaqstan injiniring» ūlttyq kompaniiasy aitty, dep habarlaidy «Adyrna» tılşısı NBK-ǧa sılteme jasap.
Käsıporynnyŋ bastapqy baǧasy 1 mlrd 120,3 mln teŋge bolyp belgılengen.
E-qazyna.kz portalyndaǧy sauda-sattyq turaly habarlandyruǧa säikes, auksion 27 qaraşada ötedı. Qazırgı uaqytta äleuettı satyp aluşylardan ötınımder qabyldanyp jatyr. Kepıldık jarna kölemı – 168 mln teŋge.
Satylymǧa jarǧylyq kapitalyndaǧy 100 paiyz üles, iaǧni käsıporynnyŋ tolyq menşıgı şyǧarylǧan. Onyŋ qūny 1 mlrd teŋgenı qūraidy. Kompaniiada 58 adam jūmys ısteidı.
Käsıporyn Astana qalasynda ornalasqan. Ol qorǧanys jäne ūlttyq qauıpsızdık salalarynda ǧylymi zertteuler jürgızıp, täjıribelık äzırlemelermen ainalysady.
Sondai-aq ūşqyşsyz aviasiialyq jüielerdıŋ operatorlaryn daiarlap, äskeri drondar şyǧarady. Önımderınıŋ qatarynda «Şaǧala-M» barlau-soqqy drony, Samuryq barlau ūşqyşsyz ūşu apparaty, jük tasymaldauǧa arnalǧan kvadrokopterler, kamikadze-drondar, barrajdauşy oq-därıler men äue nysanalary bar. Būdan bölek, ortalyq mobildı robototehnikalyq keşender de öndıredı.
Ortalyqtyŋ Qazaqstannyŋ qorǧanys önerkäsıbı üşın maŋyzy zor bolǧanymen, qarjylyq körsetkışterı köŋıl könşıtpeidı. Soŋǧy eseptı jyldyŋ qorytyndysy boiynşa käsıporynnyŋ kırısı 139,7 mln teŋgenı qūrasa, şyǧyndary şamamen 724,7 mln teŋgege jetken. Qysqa merzımdı aktivterı 465 mln teŋge, ūzaq merzımdı aktivterı 250,8 mln teŋge dep baǧalanǧan. Al mındettemelerınıŋ kölemı 704,8 mln teŋgenı qūraǧan. Kompaniianyŋ rentabeldılıgı nöldık deŋgeide bolǧan.
Qazan aiynyŋ soŋyndaǧy jaǧdai boiynşa käsıporynnyŋ kreditorlar aldyndaǧy bereşegı şamamen 493,4 mln teŋgege jetken. Onyŋ basym bölıgı alynǧan avanstar men qaryzdar boiynşa mındettemelerden tūrady. Sonymen qatar satyp aluşylar men tapsyrys beruşılerdıŋ «R&D ortalyǧyna» bereşegı şamamen 305 mln teŋgenı qūraidy.
