Äleumettık jelılerde 20 jeltoqsan künı Jambyl oblysyndaǧy temırjolda oqys oqiǧa bolǧany turaly aqparat tarady. Atalǧan jaǧdaiǧa Qazaqstan temırjoly ūlttyq kompaniiasy men Qorǧanys ministrlıgı resmi tüsınıkteme berdı, dep habarlaidy "Adyrna".
Telegram-arnalardyŋ bırınde jariialanǧan mälımetke säikes, 20 jeltoqsanda Jambyl oblysynda sūryptau döŋesınde vagondardy tarqatu kezınde üş jük vagony bır-bırımen soqtyǧysqan. Sonyŋ saldarynan barlyq döŋgelek jūptarymen relsten şyǧyp, audarylǧany aitylǧan. Sondai-aq beiresmi derekközder ekı vagonda Qorǧanys ministrlıgıne tiesılı äskeri-tehnikalyq mülık bolǧanyn alǧa tartqan.
Osy aqparatqa bailanysty Qazaqstan temırjoly kompaniiasynyŋ baspasöz qyzmetı mälımet berdı. Kompaniia ökılderınıŋ mälımetınşe, oqiǧa 20 jeltoqsan künı saǧat 21:25-te Jambyl oblysyndaǧy Türksıb stansiiasynda oryn alǧan. Manevrlık jūmystar barysynda tarqatylyp jatqan vagondar jolǧa şyǧuǧa daiyn tūrǧan jük poiyzymen soqtyǧysqan.
«Oqiǧa saldarynan qaza tapqandar men zardap şekkender joq. Poiyzdar qozǧalysynda kıdırıs bolǧan joq, özge qūramdardyŋ jüru kestesıne äser etpedı. Qalpyna keltıru jūmystary jedel türde jürgızıldı», — dep habarlady kompaniianyŋ baspasöz qyzmetı.
Qazırgı taŋda Türksıb stansiiasy qalypty rejimde jūmys ıstep tūr.
Sonymen qatar oqiǧaǧa qatysty Qorǧanys ministrlıgınıŋ baspasöz qyzmetı de resmi mälımdeme jasady. Vedomstvonyŋ habarlauynşa, 20 jeltoqsanda Türksıb stansiiasynda manevrlık jūmystar kezınde bırneşe vagon relsten şyqqan. Alaida olardyŋ qūramynda äskeri tehnika, qaru-jaraq nemese oq-därı bolmaǧan.
Qūzyrly organdar oqiǧanyŋ män-jaiyn anyqtaudy jalǧastyryp jatyr.
Eske sala keteiık, 2021 jyldyŋ 26 tamyzynda saǧat 19:10-da Baizaq audany Qainar auylynda ornalasqan Qazaqstan Respublikasy Qorǧanys ministrlıgınıŋ No28349 äskeri bölımınıŋ (injenerlık brigada) oq-därı qoimasy temırjol boiynda janǧan bolatyn. Apat bolǧan jerge baratyn barlyq joldar, sonyŋ ışınde temırjol uaqytşa jabylǧan edı.
