الەۋمەتتىك جەلىلەردە 20 جەلتوقسان كۇنى جامبىل وبلىسىنداعى تەمىرجولدا وقىس وقيعا بولعانى تۋرالى اقپارات تارادى. اتالعان جاعدايعا قازاقستان تەمىرجولى ۇلتتىق كومپانياسى مەن قورعانىس مينيسترلىگى رەسمي تۇسىنىكتەمە بەردى، دەپ حابارلايدى "ادىرنا".
Telegram-ارنالاردىڭ بىرىندە جاريالانعان مالىمەتكە سايكەس، 20 جەلتوقساندا جامبىل وبلىسىندا سۇرىپتاۋ دوڭەسىندە ۆاگونداردى تارقاتۋ كەزىندە ءۇش جۇك ۆاگونى ءبىر-بىرىمەن سوقتىعىسقان. سونىڭ سالدارىنان بارلىق دوڭگەلەك جۇپتارىمەن رەلستەن شىعىپ، اۋدارىلعانى ايتىلعان. سونداي-اق بەيرەسمي دەرەككوزدەر ەكى ۆاگوندا قورعانىس مينيسترلىگىنە تيەسىلى اسكەري-تەحنيكالىق مۇلىك بولعانىن العا تارتقان.
وسى اقپاراتقا بايلانىستى قازاقستان تەمىرجولى كومپانياسىنىڭ ءباسپاسوز قىزمەتى مالىمەت بەردى. كومپانيا وكىلدەرىنىڭ مالىمەتىنشە، وقيعا 20 جەلتوقسان كۇنى ساعات 21:25-تە جامبىل وبلىسىنداعى تۇركسىب ستانتسياسىندا ورىن العان. مانەۆرلىك جۇمىستار بارىسىندا تارقاتىلىپ جاتقان ۆاگوندار جولعا شىعۋعا دايىن تۇرعان جۇك پويىزىمەن سوقتىعىسقان.
«وقيعا سالدارىنان قازا تاپقاندار مەن زارداپ شەككەندەر جوق. پويىزدار قوزعالىسىندا كىدىرىس بولعان جوق، وزگە قۇرامداردىڭ ءجۇرۋ كەستەسىنە اسەر ەتپەدى. قالپىنا كەلتىرۋ جۇمىستارى جەدەل تۇردە جۇرگىزىلدى»، — دەپ حابارلادى كومپانيانىڭ ءباسپاسوز قىزمەتى.
قازىرگى تاڭدا تۇركسىب ستانتسياسى قالىپتى رەجيمدە جۇمىس ىستەپ تۇر.
سونىمەن قاتار وقيعاعا قاتىستى قورعانىس مينيسترلىگىنىڭ ءباسپاسوز قىزمەتى دە رەسمي مالىمدەمە جاسادى. ۆەدومستۆونىڭ حابارلاۋىنشا، 20 جەلتوقساندا تۇركسىب ستانتسياسىندا مانەۆرلىك جۇمىستار كەزىندە بىرنەشە ۆاگون رەلستەن شىققان. الايدا ولاردىڭ قۇرامىندا اسكەري تەحنيكا، قارۋ-جاراق نەمەسە وق-ءدارى بولماعان.
قۇزىرلى ورگاندار وقيعانىڭ ءمان-جايىن انىقتاۋدى جالعاستىرىپ جاتىر.
ەسكە سالا كەتەيىك، 2021 جىلدىڭ 26 تامىزىندا ساعات 19:10-دا بايزاق اۋدانى قاينار اۋىلىندا ورنالاسقان قازاقستان رەسپۋبليكاسى قورعانىس مينيسترلىگىنىڭ No28349 اسكەري ءبولىمىنىڭ (ينجەنەرلىك بريگادا) وق-ءدارى قويماسى تەمىرجول بويىندا جانعان بولاتىن. اپات بولعان جەرگە باراتىن بارلىق جولدار، سونىڭ ىشىندە تەمىرجول ۋاقىتشا جابىلعان ەدى.
