«كىتاپ وقيتىن ۇلت» رەسپۋبليكالىق جوباسىنىڭ كارتاسى كەڭەيىپ كەلەدى. بۇگىن جالپىۇلتتىق باستاماعا بىردەن ءۇش ءوڭىر – جامبىل، اباي جانە پاۆلودار وبلىستارى قوسىلدى.
«كىتاپ وقيتىن ۇلت – چيتايۋششايا ناتسيا» قوعامدىق قورىنىڭ توراعاسى باقىتجان تۇرلىبەكوۆتىڭ ءوڭىر باسشىلارىمەن وتكىزگەن جۇمىس كەزدەسۋلەرى اياسىندا كىتاپ وقۋ مادەنيەتىن دامىتۋعا جانە جوبانى وڭىرلەردە ىسكە اسىرۋعا باعىتتالعان ىنتىماقتاستىق تۋرالى مەموراندۋمدارعا قول قويىلدى.
جوباعا قوسىلعان ءاربىر ءوڭىر قازاقستاننىڭ رۋحاني-مادەني كارتاسىندا ايرىقشا ورىن الادى. جامبىل وبلىسى – باۋىرجان مومىشۇلى دۇنيەگە كەلگەن قاسيەتتى ولكە. ونىڭ «ۇشقان ۇيا» شىعارماسى رەسپۋبليكالىق «كىتاپ وقيتىن ۇلت» كىتاپ وقۋ مارافونىنىڭ ۇسىنىلعان ادەبيەتتەر تىزىمىنە ەنگىزىلگەن. اباي وبلىسى – قازاقتىڭ ۇلى ويشىلى اباي قۇنانبايۇلى مەن شاكارىم قۇدايبەردىۇلىنىڭ تۋعان جەرى، ولاردىڭ ادەبي-فيلوسوفيالىق مۇراسى ۇلتتىق رۋحانياتتىڭ بەرىك نەگىزىنە اينالدى. پاۆلودار وبلىسى – ءماشھۇر ءجۇسىپ پەن سۇلتانماحمۇت تورايعىروۆتىڭ قاسيەتتى مەكەنى. ولار قازاق ادەبيەتى مەن اعارتۋشىلىق ويىنىڭ دامۋىنا ولشەۋسىز ۇلەس قوستى.
سوندىقتان بۇل وڭىرلەردىڭ جوباعا قوسىلۋىنىڭ سيمۆولدىق ءمانى ەرەكشە. «كىتاپ وقيتىن ۇلت» باستاماسى وڭىرلەردى عانا ەمەس، ەلىمىزدىڭ باي ادەبي مۇراسىن دا ءبىر ارناعا توعىستىرىپ، كلاسسيكالىق شىعارمالار ارقىلى جاڭا بۋىننىڭ دۇنيەتانىمىن قالىپتاستىراتىن ءبىرتۇتاس وقۋ كەڭىستىگىن قۇرۋدى ماقسات ەتەدى.
جوبا اياسىندا اتالعان ءۇش وڭىردە مەكتەپ وقۋشىلارى، ستۋدەنتتەر، پەداگوگتەر، مەملەكەتتىك قىزمەتشىلەر، سپورت سالاسىنىڭ وكىلدەرى، ەڭبەك ۇجىمدارى مەن وتباسىلار اراسىندا كىتاپ وقۋدى ناسيحاتتاۋعا، وقۋ مادەنيەتىن دامىتۋعا جانە وتباسىلىق كىتاپ وقۋ ءداستۇرىن نىعايتۋعا باعىتتالعان اۋقىمدى ءىس-شارالار جۇزەگە اسىرىلادى.
«كىتاپ وقيتىن ۇلت – چيتايۋششايا ناتسيا» قوعامدىق قورىنىڭ توراعاسى باقىتجان تۇرلىبەكوۆ جوبانىڭ كەڭەيۋى جالپىۇلتتىق كىتاپ وقۋ قوزعالىسىن قالىپتاستىرۋداعى جاڭا كەزەڭ ەكەنىن اتاپ ءوتتى.
«جوباعا قوسىلعان ءاربىر جاڭا ءوڭىر – "كىتاپ وقيتىن ۇلت" تاريحىنداعى جاڭا تاراۋ. بۇگىن باستاماعا قازاقستانعا ۇلى اقىندار مەن جازۋشىلاردى، ويشىلدار مەن اعارتۋشىلاردى سىيلاعان وڭىرلەر قوسىلىپ وتىر. ولاردىڭ مۇراسى كىتاپتىڭ قاشاندا ءبىلىمنىڭ، رۋحاني قۇندىلىقتاردىڭ جانە ۇلتتىق سانانىڭ قاينار كوزى بولعانىن ايقىن كورسەتەدى. ءبىزدىڭ ماقساتىمىز – قازاق ادەبيەتىنىڭ تاڭداۋلى تۋىندىلارىن بالالاردىڭ، جاستاردىڭ جانە ءاربىر وتباسىنىڭ كۇندەلىكتى ءومىرىنىڭ اجىراماس بولىگىنە اينالدىرۋ»، – دەدى باقىتجان تۇرلىبەكوۆ.
الداعى ۋاقىتتا جامبىل، اباي جانە پاۆلودار وبلىستارىندا وڭىرلىك جوبالىق كەڭسەلەر قۇرىلىپ، ءبىلىم بەرۋ جانە مادەنيەت ۇيىمدارىندا ۇيلەستىرۋشىلەر ايقىندالادى. سونىمەن قاتار قاتىسۋشىلاردى تىركەۋگە جانە وقىلعان كىتاپتاردى ەسەپكە الۋعا ارنالعان تسيفرلىق پلاتفورما ىسكە قوسىلادى. جوباعا اۋىلدىق جانە شالعاي ەلدى مەكەندەردىڭ تۇرعىندارىن كەڭىنەن تارتۋعا ەرەكشە نازار اۋدارىلىپ، ءاربىر وتباسىنىڭ قاتىسۋىنا مۇمكىندىك جاسالادى.
وسىلايشا «كىتاپ وقيتىن ۇلت» جوباسى قازاقستاندى ورتاق قۇندىلىق – كىتاپتىڭ توڭىرەگىنە بىرىكتىرىپ، ەلدىڭ زياتكەرلىك بولاشاعىن قالىپتاستىرۋ جولىندا سەنىمدى قادام جاساپ كەلەدى.
