فوتو: اعىباي اياپبەرگەنوۆ/Kazinform
استانادا مەملەكەتتىك سىيلىقتىڭ يەگەرى، جازۋشى-دراماتۋرگ روزا مۇقانوۆانىڭ «ماڭگىلىك بالا بەينە» شىعارماسىنىڭ قازاق جانە اعىلشىن تىلدەرىندەگى سپەكتاكل-كىتابىنىڭ تانىستىرىلىمى ءوتتى، دەپ حابارلايدى “ادىرنا” ۇلتتىق پورتالى قازاقپاراتقا سىلتەپ.
ءىس-شاراعا قالامگەرلەر، عالىمدار، تەاتر رەجيسسەرلەرى مەن مادەنيەت سالاسىنىڭ وكىلدەرى قاتىسىپ، تۋىندىنىڭ كوركەمدىك جانە قوعامدىق ماڭىزى تۋرالى پىكىر ءبىلدىردى.
ەكى تىلدە جارىق كورگەن كىتاپتى «Arman-PV» باسپاسى ازىرلەگەن. باسپا ديرەكتورى ديدارا الينا شىعارمانىڭ جاڭا فورماتتا ۇسىنىلعانىن ايتىپ، ونىڭ جۋىردا فرانكفۋرت حالىقارالىق كىتاپ كورمەسىندە تانىستىرىلعانىن جەتكىزدى. ونىڭ سوزىنشە، تۋىندىعا شەتەلدىك وقىرماندار تاراپىنان دا قىزىعۋشىلىق جوعارى. ويتكەنى شىعارمادا سەمەي يادرولىق پوليگونىنىڭ زاردابى مەن ينكليۋزيا ماسەلەسى قاتار قوزعالادى.
ايتا كەتەيىك، «ماڭگىلىك بالا بەينە» شىعارماسىنىڭ باستى كەيىپكەرى – ءلايلا ەسىمدى 16 جاستاعى قىز. الايدا ونىڭ دەنە ءبىتىمى سەگىز جاسار بالانىڭ قالپىندا قالعان. تاعدىر تاۋقىمەتىن تارتقان قىز جاقىندارىنىڭ كەمسىتۋى مەن اۋىر سوزدەرىنە توتەپ بەرۋگە ءماجبۇر. جان دۇنيەسىن تۇسىنەتىن جان تاپپاعان ول تۇندە ايمەن سىرلاسىپ، ىشىندەگى مۇڭىن سوعان شاعادى.
اۆتور ءلايلانىڭ تاعدىرى ارقىلى مۇمكىندىگى شەكتەۋلى جانداردىڭ جان كۇيزەلىسىن، قوعامداعى كوزقاراس پەن قارىم-قاتىناس ماسەلەسىن كورسەتەدى. سونىمەن قاتار شىعارمادا سەمەي يادرولىق پوليگونىنىڭ ادام دەنساۋلىعى مەن تابيعاتقا تيگىزگەن زاردابى سۋرەتتەلگەن. كەيىپكەردىڭ ءومىرى ارقىلى جازۋشى يادرولىق سىناقتاردىڭ سالدارى تۇتاس ۇرپاقتىڭ تاعدىرىنا اسەر ەتكەنىن اڭعارتادى.
تانىستىرىلىم بارىسىندا تەاترتانۋشى نارتاي ەسكەندىر دە تۋىندىنىڭ تاريحي جانە كوركەمدىك ماڭىزىنا توقتالدى. ونىڭ ايتۋىنشا، روزا مۇقانوۆا تاۋەلسىزدىكتىڭ العاشقى جىلدارىندا قوعامدا اشىق ايتىلا بەرمەگەن كۇردەلى تاقىرىپتاردى كوتەرگەن قالامگەرلەردىڭ ءبىرى. ال «ماڭگىلىك بالا بەينە» – سەمەي پوليگونىنىڭ قاسىرەتىن جەكە ادامنىڭ تاعدىرى ارقىلى جەتكىزگەن ماڭىزدى شىعارما.
سونداي-اق تەاترتانۋشى تۋىندىنىڭ 1996 جىلى مۇحتار اۋەزوۆ اتىنداعى اكادەميالىق دراما تەاترىندا رەجيسسەر بولات اتاباەۆتىڭ قويىلىمىمەن ساحنالانعانىن ەسكە سالدى. ونىڭ پىكىرىنشە، شىعارمادا ءلايلانىڭ ءتان جاراسىمەن قاتار، ىشكى جان دۇنيەسىندەگى ارپالىس تا تەرەڭ بەينەلەنگەن.
جيىندا ءسوز العان وزگە دە ماماندار ءلايلا بەينەسىنە قاتىستى تىڭ پىكىرلەرىن ورتاعا سالدى. ولاردىڭ پايىمىنشا، كەيىپكەر تەك يادرولىق سىناقتىڭ زاردابىن تارتقان جاننىڭ بەينەسى ەمەس، سونىمەن بىرگە وزىندىك ۇستانىمى مەن وزگەشە بولمىسى ءۇشىن قوعامعا سىيمايتىن تۇلعالاردىڭ سيمۆولى رەتىندە دە قاراستىرىلادى.
