«پاۆلودار وبلىسىنىڭ جەر قويناۋىن پايدالانۋ، قورشاعان ورتا جانە سۋ رەسۋرستارى باسقارماسىنا» قاراستى «ماكسيم-گوركي ورمان جانە جانۋارلار الەمىن قورعاۋ جونىندەگى مەكەمە» 2024 جىلى 135 171 812 تەڭگەگە 2 162 749 دانا قاراعاي كوشەتىن ساتىپ الماق، - دەپ حابارلايدى ادىرنا ۇلتتىق پورتالى https://satypalu.gov.kz/kz/ سايتىنا سىلتەمە جاساپ.
«پاۆلودار وبلىسىنىڭ مەملەكەتتىك ساتىپ الۋ باسقارماسى» 2024 جىلى 2 ميلليون دانادان اسا قاراعاي كوشەتىن ەگۋ ماقساتىنداعى تەندەردى 28 قاراشا كۇنى تەندەر جاريالاعان. جەڭىمپاز كومپانيا 13 جەلتوقسان كۇنى انىقتالماق.
قۇنى 135 171 812 تەڭگەگە باعالانعان مەملەكەتتىك ساتىپ الۋدىڭ تەحنيكالىق سيپاتتاماسىندا تاۋاردى كومپانيا كورسەتىلگەن جەرگە جەتكىزگەننەن كەيىن ساتۋشىنىڭ جاۋاپكەرشىلىگى اياقتالاتىنى جازىلعان. ياعني، كوشەتتەردى ەگۋ، كۇتۋ، باپتاۋ جۇمىستارى 135 171 812 تەڭگەگە كىرمەيدى دەگەن ءسوز. دەمەك، 135 171 812 تەڭگەگە 2 162 749 دانا ساتىپ الاتىن بولسا، قاراعاي كوشەتىنىڭ ءار داناسى 62.5 تەڭگەدەن بولۋى ءتيىس دەگەن ءسوز.
سونداي-اق، قاراعاي كوشەتىنىڭ جاسى 2 جاستان كەم ەمەس جانە 3 جاستان اسپايتىن، ساباقتىڭ بيىكتىگى 10 سم-دەن كەم ەمەس جانە 15 سم-دەن اسپايتىن، تامىر موينىنداعى ساباقتىڭ قالىڭدىعى كەمىندە 2,5 مم، تامىر جۇيەسىنىڭ ۇزىندىعى كەمىندە 20 سم جانە 30 سم-دەن اسپايتىن بولۋى جانە 2024 جىلدىڭ 1-10 ءساۋىر ارالىعىندا – 1 142 800 دانا، 2024 جىلدىڭ 15-20 قىركۇيەك ارالىعىندا 1 019 949 دانا جەتكىزىلۋى كەرەكتىگى كورسەتىلگەن.
بۇل كوشەتتەر پاۆلودار وبلىسىنىڭ تەرەڭكول اۋدانىنا قاراستى بوبروۆكا اۋىلدىق وكرۋگىنىڭ قاشىر ورمانشىلىعىنا ەگىلەدى.
تەحنيكالىق سيپاتتامادا كورسەتىلگەن ولشەمدەرگە سايكەس كوشەتتەردىڭ باعاسى ينتەرنەتتە 25-30 تەڭگەدەن سامساپ تۇر.
ءبىزدى ەندى مىنانداي سۇراقتار مازالايدى. پاۆلودار وبلىسىنىڭ مەملەكەتتىك ساتىپ الۋ باسقارماسى ءار دانانى 62.5 تەڭگەگە قانداي نەگىزگە سۇيەنىپ باعالاپ وتىر؟ سونىمەن قاتار، كورسەتىلگەن اۋماققا 2 162 749 كوشەت ەگىلگەنىن قالاي باقىلايدى؟ ونى باقىلاۋ ءۇشىن ارنايى كومميسسيا قۇرىلعان با؟ كوشەتتەردىڭ ءونىپ، جەرسىنىپ كەتۋىنە كىم كەپىلدىك بەرەدى؟ تاپسىرىس بەرۋشى مەكەمە 2 ميلليوننان استام كوشەتتەردىڭ تولىقتاي ەگىلگەنىن قالاي دالەلدەيدى؟
بۇل سۇراقتاردى ءتيىستى مەكەمەگە جولدادىق. جاۋاپ كەلىپ جاتسا، ونى دا جاريالايتىن بولامىز.
قانات بىرلىكۇلى،
"ادىرنا" ۇلتتىق پورتالى
