«Pavlodar oblysynyń jer qoınaýyn paıdalaný, qorshaǵan orta jáne sý resýrstary basqarmasyna» qarasty «Maksım-Gorkıı orman jáne janýarlar álemin qorǵaý jónindegi mekeme» 2024 jyly 135 171 812 teńgege 2 162 749 dana qaraǵaı kóshetin satyp almaq, - dep habarlaıdy Adyrna ulttyq portaly https://satypalu.gov.kz/kz/ saıtyna silteme jasap.
«Pavlodar oblysynyń memlekettik satyp alý basqarmasy» 2024 jyly 2 mıllıon danadan asa qaraǵaı kóshetin egý maqsatyndaǵy tenderdi 28 qarasha kúni tender jarııalaǵan. Jeńimpaz kompanııa 13 jeltoqsan kúni anyqtalmaq.
Quny 135 171 812 teńgege baǵalanǵan memlekettik satyp alýdyń tehnıkalyq sıpattamasynda taýardy kompanııa kórsetilgen jerge jetkizgennen keıin satýshynyń jaýapkershiligi aıaqtalatyny jazylǵan. Iaǵnı, kóshetterdi egý, kútý, baptaý jumystary 135 171 812 teńgege kirmeıdi degen sóz. Demek, 135 171 812 teńgege 2 162 749 dana satyp alatyn bolsa, qaraǵaı kóshetiniń ár danasy 62.5 teńgeden bolýy tıis degen sóz.
Sondaı-aq, qaraǵaı kóshetiniń jasy 2 jastan kem emes jáne 3 jastan aspaıtyn, sabaqtyń bıiktigi 10 sm-den kem emes jáne 15 sm-den aspaıtyn, tamyr moınyndaǵy sabaqtyń qalyńdyǵy keminde 2,5 mm, tamyr júıesiniń uzyndyǵy keminde 20 sm jáne 30 sm-den aspaıtyn bolýy jáne 2024 jyldyń 1-10 sáýir aralyǵynda – 1 142 800 dana, 2024 jyldyń 15-20 qyrkúıek aralyǵynda 1 019 949 dana jetkizilýi kerektigi kórsetilgen.
Bul kóshetter Pavlodar oblysynyń Tereńkól aýdanyna qarasty Bobrovka aýyldyq okrýginiń Qashyr ormanshylyǵyna egiledi.
Tehnıkalyq sıpattamada kórsetilgen ólshemderge sáıkes kóshetterdiń baǵasy ınternette 25-30 teńgeden samsap tur.
Bizdi endi mynandaı suraqtar mazalaıdy. Pavlodar oblysynyń memlekettik satyp alý basqarmasy ár danany 62.5 teńgege qandaı negizge súıenip baǵalap otyr? Sonymen qatar, kórsetilgen aýmaqqa 2 162 749 kóshet egilgenin qalaı baqylaıdy? Ony baqylaý úshin arnaıy kommıssııa qurylǵan ba? Kóshetterdiń ónip, jersinip ketýine kim kepildik beredi? Tapsyrys berýshi mekeme 2 mıllıonnan astam kóshetterdiń tolyqtaı egilgenin qalaı dáleldeıdi?
Bul suraqtardy tıisti mekemege joldadyq. Jaýap kelip jatsa, ony da jarııalaıtyn bolamyz.
Qanat Birlikuly,
"Adyrna" ulttyq portaly
