اقساي قالاسىندا تولىق جاڭعىرتىلعان «قازاقستان» تەمىرجول ۆوكزالىنىڭ سالتاناتتى اشىلۋ ءراسىمى ءوتتى. ءىس-شاراعا وبلىس اكىمى ناريمان تورەعاليەۆ قاتىسىپ، تۇرعىنداردى ماڭىزدى ينفراقۇرىلىمدىق نىساننىڭ پايدالانۋعا بەرىلۋىمەن قۇتتىقتادى. ايماق باسشىسى جوبانى ساپالى ءارى ۋاقىتىلى جۇزەگە اسىرعان مەردىگەر كومپانيا مەن قۇرىلىسشىلارعا العىس ايتتى.
- مەملەكەت باسشىسى قاسىم-جومارت كەمەلۇلى توقاەۆتىڭ تاپسىرماسىنا سايكەس تاۋەلسىزدىك جىلدارى ەلىمىزدە العاش رەت تەمىرجول ۆوكزالدارىن كەڭ اۋقىمدى جاڭعىرتۋ باعدارلاماسى جۇزەگە اسىرىلىپ جاتىر. وتكەن جىلى «قازاقستان تەمىر جولى» ۇلتتىق كومپانياسىنىڭ تاپسىرىسىمەن وڭىردەگى 4 تەمىرجول نىسانىن جاڭعىرتۋ باستالدى. كۇنى كەشە جاڭادان سالىنعان سەميگلاۆىي مار ستانتسياسىن اشساق، بۇگىن ەكىنشى بەكەتتى پايدالانۋعا بەرىپ وتىرمىز. بۇل جۇمىستار ءوڭىردىڭ الەۋمەتتىك-ەكونوميكالىق دامۋىنا، ىسكەرلىك بەلسەندىلىكتى ارتتىرۋعا جانە تۋريستىك الەۋەتىن نىعايتۋعا وڭ اسەر ەتەدى، - دەدى ناريمان تورەعاليەۆ.
90 جىلدىق تاريحى بار «قازاقستان» ۆوكزالىن جاڭعىرتۋ جۇمىستارى اياسىندا عيمارات تولىق جاڭارتىلىپ، زاماناۋي ساۋلەتتىك كەلبەتكە يە بولدى. سونىمەن قاتار 2 پەررون مەن ۆوكزال ماڭىنداعى كوپىر قالپىنا كەلتىرىلىپ، ينجەنەرلىك ينفراقۇرىلىم جەلىلەرى جاڭارتىلدى. اينالا اباتتاندىرىلىپ، جولاۋشىلار ءۇشىن قولايلى جاعداي جاسالدى.
