بۇگىن قاراشىعاناقتى كەڭەيتۋ جوباسى اياسىندا جىلىنا 4 ملرد تەكشە مەتر گازدى كەرى ايداۋعا قاۋقارلى 6-كومپرەسسور ىسكە قوسىلدى. سالتاناتتى راسىمگە وبلىس اكىمى ناريمان تورەعاليەۆ، ەنەرگەتيكا مينيسترلىگى، ۋاكىلەتتى ورگان – «PSA» جشس، سەرىكتەس كومپانيالاردىڭ وكىلدەرى جانە كپو باسشىلىعى قاتىستى.
ايماق باسشىسى پرەزيدەنت قاسىم-جومارت توقاەۆ 2023 جىلدىڭ ناۋرىز ايىندا باتىس قازاقستان وبلىسىنا جاساعان جۇمىس ساپارى اياسىندا مۇناي-گاز سالاسىن ودان ءارى دامىتۋ جونىندە ناقتى تاپسىرمالار بەرگەنىن اتاپ ءوتتى.
- مەملەكەت باسشىسى كومپانيانىڭ وڭىردەگى الەۋمەتتىك-ينفراقۇرىلىمدىق جوبالاردى قارجىلاندىرۋ جانە ەكونوميكالىق ءوسىمدى قامتاماسىز ەتۋدەگى ۇلەسىن وڭ باعالادى. مەملەكەت پەن ينۆەستورلار اراسىنداعى ءتيىمدى ىنتىماقتاستىقتىڭ جارقىن كورىنىسى رەتىندە بۇگىن ەلىمىزدىڭ مۇناي-گاز ونەركاسىبى ءۇشىن ماڭىزدى جوبانى ىسكە قوسىپ وتىرمىز. حالىقارالىق سەرىكتەستەر، ينجەنەرلىك-تەحنيكالىق ماماندار مەن قۇرىلىسشىلار، ينۆەستيتسيالىق شەشىمدى قابىلداۋعا قاتىسىپ، مىندەتتەمەلەردىڭ ساپالى ءارى ۋاقىتىلى ورىندالۋىن قامتاماسىز ەتكەن وكىلەتتى ورگان – «PSA» جشس باس ديرەكتورى، باسقارما توراعاسى بەكەت يزباستين باستاعان ۇجىمعا ناتيجەلى ەڭبەك ءۇشىن العىس بىلدىرەمىن، - دەدى ناريمان تورەعاليەۆ.

وبلىس اكىمى جەرگىلىكتى قامتۋ ۇلەسىن ارتتىرۋ، وتاندىق كاسىپورىنداردى قولداۋ جانە حالىقتى جۇمىسپەن قامتۋ مەملەكەت ساياساتىنىڭ باسىم باعىتتارى ەكەنىن اتاپ ءوتتى. جاڭا كومپرەسسوردىڭ قۇرىلىسىنا 2 مىڭعا جۋىق جەرگىلىكتى تۇرعىن تارتىلدى.
ماڭىزدى جوبا گاز فاكتورىن تومەندەتۋ، جانە كەن ورنىنداعى سۇيىق كومىرسۋتەكتەر ءوندىرۋ دەڭگەيىن تۇراقتى ساقتاۋعا باعىتتالعان. 6-كومپرەسسوردىڭ ءساتتى ىسكە قوسىلۋى قاراشىعاناق تاريحىنداعى جاڭا كەزەڭنىڭ باستالعانىن بىلدىرەدى جانە كپو-نىڭ الەمدىك دەڭگەيدەگى ءىرى جوبالاردى تابىستى جۇزەگە اسىرۋ الەۋەتىن كورسەتەدى.

ايتا كەتەيىك، كپو وبلىستا الەۋمەتتىك جانە ينفراقۇرىلىمدىق جوبالاردىڭ جۇزەگە اسىرىلۋىنا دا ەلەۋلى ۇلەس قوسىپ كەلەدى. 2025-2026 جىلدارى 24 جوبا تولىق اياقتالىپ، پايدالانۋعا بەرىلدى. ءوزارا ءتيىمدى ىنتىماقتاستىقتىڭ ناتيجەسىندە «اۋىل اماناتى» باعدارلاماسىنا قاتىسۋشى ءوڭىر تۇرعىندارى كومپانياعا 1,3 ملرد تەڭگەنىڭ ءونىمىن وتكىزدى. كەشەندى قولداۋ شارالارى ەڭ الدىمەن حالىقتىڭ تۇرمىس ساپاسىن جاقسارتۋعا باعىتتالىپ وتىر.
باتىس قازاقستان وبلىسى «كىتاپ وقيتىن ۇلت» جوباسىن ىسكە اسىرۋ ءۇشىن مەملەكەت پەن ازاماتتىق قوعامنىڭ كۇشىن بىرىكتىرۋدە
