قايتا جاڭعىرتىلعان "جاستار" ستاديونى پايدالانۋعا بەرىلدى

376
Adyrna.kz Telegram
https://www.adyrna.kz/storage/uploads/rKhxwz45iD7E9pvPK5Yi5ypajl5s3FzWH9bq3Yt6.jpg
اقساي قالاسىندا قايتا جاڭعىرتۋدان وتكەن «جاستار» ستاديونى پايدالانۋعا بەرىلدى. سالتاناتتى راسىمگە وبلىس اكىمى ناريمان تورەعاليەۆ، تاپسىرىس بەرىشىلەر مەن مەردىگەر كومپانيا باسشىلارى، اۋدان تۇرعىندارى قاتىستى. 
ايماق باسشىسى جينالعانداردى ەل تاۋەلسىزدىگىنىڭ 35 جىلدىعى قارساڭىندا جاڭا كەيىپكە ەنگەن نىساننىڭ اشىلۋىمەن قۇتتىقتادى. ناريمان تورەعاليەۆ بۇقارالىق سپورتتى دامىتۋ، ۇلت ساۋلىعىن نىعايتۋ مەملەكەت ساياساتىنىڭ باسىم باعىتتارى ەكەنىن اتاپ ءوتتى. 
- مەملەكەت باسشىسى قاسىم-جومارت كەمەلۇلى توقاەۆتىڭ تاپسىرماسىنا سايكەس وڭىرىمىزدە الەۋمەتتىك ينفراقۇرىلىمدى دامىتۋ باعىتىندا اۋقىمدى جۇمىستار اتقارىلدى. 2023–2026 جىلدارى جاڭا 132 الەۋمەتتىك نىسان پايدالانۋعا بەرىلدى. ونىڭ ىشىندە 24 سپورت نىسانى سالىندى. بارلىق اۋدان ورتالىعى مەن ءىرى اۋىلدار دەنە شىنىقتىرۋ-ساۋىقتىرۋ كەشەندەرىمەن قامتىلدى. ەندى مۇنداي زاماناۋي نىساندار شاعىن ەلدى مەكەندەردە بوي كوتەرىپ جاتىر. قايتا جاڭعىرتىلعان «جاستار» ستاديونى جاس سپورتشىلاردى جاڭا بەلەستەرگە قاناتتاندىراتىنىنا سەنىم مول، - دەدى وبلىس اكىمى.
كوپبەيىندى كەشەن «كپو ب.ۆ.» كومپانياسىنىڭ الەۋمەتتىك مىندەتتەمەلەرى اياسىندا قايتا جاڭعىرتىلدى. مۇندا زاماناۋي سپورت زالى، FIFA ستاندارتتارىنا ساي فۋتبول الاڭى، ۇلتتىق ويىندار جانە جاتتىعۋ الاڭدارى، جۇگىرۋ جولدارى مەن ەكسترەمالدى سپورت تۇرلەرىنە ارنالعان ارنايى ايماق قاراستىرىلعان. جوبانى ۋاقىتىلى ءارى ساپالى اتقارعان مەردىگەرلىك ۇيىم – «قالدىعايتى» كومپانياسىنا وبلىس اكىمىنىڭ العىس حاتى تابىستالدى.
ايماق باسشىسى سپورت الاڭدارىن ارالاپ، مەكەمە باسشىلىعى، باپكەرلەر جانە شاكىرتتەرمەن تىلدەستى. ستاديونداعى قۇرمەت تاقتاسىنا بورلىلىك الەم چەمپيوندارى تەمىرلان كولباي، گۇلدانا المۇحامبەتوۆا، مەرۋەت باينيازوۆا، مالىك مۇقاشەۆ جانە ازاريا حامميدۋللينانىڭ سۋرەتتەرى قويىلىپ، جەتىستىكتەرى جازىلعان.  وبلىس اكىمى بۇل باستامانى وڭ باعالاپ، اعا-اپالارىنىڭ جولىن قۋاتىن جاس ورەندەرگە تىڭ سەرپىن بەرەتىنىنە سەنىم ءبىلدىردى. 
ايتا كەتەيىك، «كپو ب.ۆ.» كومپانياسىنىڭ الەۋمەتتىك جانە ينفراقۇرىلىمدىق جوبالارى اياسىندا اقساي قالاسىندا بۇدان بولەك وڭالتۋ ورتالىعى، وقۋشىلار جانە جاستار سارايىنىڭ قۇرىلىسى دا ءجۇرىپ جاتىر. 
پىكىرلەر