«اتامەكەن» ونەر ورداسىندا «التىن كوپىر» حالىقارالىق فورۋمى ءوتتى. وعان وبلىس اكىمى ناريمان تورەعاليەۆ، قۇرامىندا قوعامدىق ۇيىم كوشباسشىلارى، قازاق دياسپوراسىنىڭ وكىلدەرى بار رەسەي فەدەراتسياسى، وزبەكستان جانە قىرعىزستاننان كەلگەن دەلەگاتسيالار، جەرگىلىكتى تاريحشى عالىمدار، اقىن-جازۋشىلار، ءتىل جاناشىرلارى، ەڭبەك ارداگەرلەرى جانە جاستار قاتىستى.
ايماق باسشىسى «التىن كوپىر» فەستيۆالى اتىنا زاتى ساي، شەتەلدە تۇراتىن قازاق دياسپوراسى وكىلدەرىن تاريحي وتانىمەن بايلانىستىراتىن، تۋعان ءتىلىمىز بەن ۇلتتىق مادەنيەتىمىزدى، سالت-ءداستۇرىمىز بەن قاستەرلى قۇندىلىقتارىمىزدى ۇرپاقتان ۇرپاققا جالعاستىراتىن تاعىلىمعا تولى، رۋحاني كوپىر ەكەنىن اتاپ ءوتتى.
- مەملەكەت باسشىسى قاسىم-جومارت كەمەلۇلى توقاەۆ باستاماشى بولعان حالىقتىق كونستيتۋتسيانىڭ پرەامبۋلاسى ء«بىز، ءبىرتۇتاس قازاقستان حالقى...» دەگەن سوزدەردەن باستالادى. ءبىز بايىرعى قازاق جەرىندە مەملەكەتتىلىگىمىزدى نىعايتىپ، ۇلى دالانىڭ مىڭداعان جىلدىق تاريحىن ساقتاپ، بولاشاققا بىرگە نىق قادام باسامىز. وسىنداي باي شەجىرەلى قازاقستان – الەمنىڭ قاي تۇكپىرىندە ءومىر ءسۇرىپ جاتسا دا، ءاربىر قازاق ءۇشىن ءاردايىم تاريحي وتانىبولىپ قالا بەرەدى. ءداستۇرلى فەستيۆالدىڭ نەگىزگى ماقساتى دا – جىراقتا جۇرگەن قانداستارىمىزبەن تۇراقتى بايلانىس ورناتۋ، ورتاق قۇندىلىقتارىمىزدى دارىپتەۋ، - دەدى ناريمان تورەعاليەۆ.
باتىس قازاقستان وبلىسى رەسەي فەدەراتسياسىنىڭ 5 بىردەي ايماعىمەن شەكتەسىپ جاتىر. وڭىرارالىق ىنتىماقتاستىق وڭ جولعا قويىلعان. ايماق باسشىسى كورشى ەلدەگى قازاق دياسپوراسى وكىلدەرىمەن، قوعامدىق ۇيىمدارمەن كەزدەسۋ يگى داستۇرگە اينالعانىن تىلگە تيەك ەتتى.
- جۋىردا ورىنبور وبلىسىنا جاساعان جۇمىس ساپارىندا «بايتەرەك» قازاق قوعامدىق بىرلەستىگى مۇشەلەرىمەن كەزدەسىپ، تىنىس-تىرلىگىمەن تانىستىم. قانداستارىمىز قۇرعان ۇيىم ۇلتتىق سالت-ءداستۇر مەن ءتول تاريحتى تانىپ-ءبىلۋ، ناسيحاتتاۋ جولىندا جۇيەلى جۇمىستار اتقارىپ جاتىر. تۇپتەپ كەلگەندە، اراقاشىقتىق ۇلتتىق بولمىستى ساقتاۋعا كەدەرگى بولماۋى ءتيىس. تاتۋ كورشىلىككە نەگىزدەلگەن ساياسات ۇستانعان مەملەكەتتەر باسشىلارى دا بۇعان ەرەكشە ءمان بەرىپ كەلەدى، - دەدى وبلىس اكىمى.
فورۋمدا ء تول تاريحتى تۇگەندەۋ، قازاق ءتىلىنىڭ قولدانىلۋ اياسىن كەڭەيتۋ جانە ءوزارا ىنتىماقتاستىقتى ودان ءارى نىعايتۋعا باعىتتالعان ۇتىمدى ۇسىنىستار مەن پاراساتتى پىكىرلەر ايتىلدى.
