ورال قالاسىندا وزەن جاعالاۋىندا «تازا قازاقستان» جالپىۇلتتىق ەكولوگيالىق اكتسياسى اياسىندا «ەكوكۆەست» شاراسى ءوتتى. ءىس-شارانىڭ نەگىزگى ماقساتى – «تازا قازاقستان» تۇجىرىمداماسىنىڭ يدەولوگياسىن كەڭىنەن ناسيحاتتاۋ، جاستار اراسىندا ەكولوگيالىق مادەنيەت پەن جاۋاپكەرشىلىكتى قالىپتاستىرۋ، قورشاعان ورتاعا ۇقىپتى قاراۋ قۇندىلىقتارىن دارىپتەۋ.
شاراعا قالامىزدىڭ بەلسەندى جاستارىنان قۇرىلعان توپتار قاتىستى. ءىس-شارا بارىسىندا الدىن الا جاساقتالعان توپتار وزەن جاعالاۋلارىن قوقىستاردان تازارتا ءجۇرىپ، قىزىقتى تاپسىرمالار ورىنداۋ ارقىلى سايىسقا ءتۇستى.
شارانىڭ اشىلۋىندا سارسەنباەۆ نۇرسۇلتان چاپاەۆيچ، بقو جاستارمەن جۇمىس جونىندەگى رەسۋرستىق ورتالىعى باسشىسىنىڭ ورىنباسارى:
«بۇگىنگى شارانىڭ باستى ءمانى – جاستارعا “تازا قازاقستان” يدەياسىن دۇرىس ءتۇسىندىرۋ جانە ولاردىڭ بەلسەندى ازاماتتىق ۇستانىمىن قالىپتاستىرۋ. ەكولوگيالىق مادەنيەت – ەل بولاشاعىنىڭ ساپاسىن ايقىندايتىن ماڭىزدى فاكتور. وسى باعىتتا جاستاردىڭ باستامالارىن قولداۋ – ءبىزدىڭ نەگىزگى مىندەتىمىز».
كۆەست بارىسىندا بەلسەندى جاستار ءوز ويلارىن ورتاعا سالىپ، ءتۇرلى باعىتتاعى ەكولوگيالىق ماسەلەلەردىڭ شەشۋ جولدارىن ۇسىنىپ، ورتاق تالقىلاۋ الاڭىن قۇردى. ەكولوگيالىق ۆولونتەرلىك، جاستار جوبالارى مەن باستامالاردى قولداۋ ماسەلەلەرى دە تالقىلاندى.
ۇيىمداستىرۋشىلار مۇنداي شارالاردىڭ الداعى ۋاقىتتا دا جالعاساتىنىن اتاپ ءوتىپ، ءوڭىر جاستارىن «تازا قازاقستان» اكتسياسى اياسىنداعى ەكولوگيالىق ءىس-شارالارعا بەلسەندى قاتىسۋعا شاقىردى.
