قازاقستاننىڭ بولاشاعى – ونىڭ جاستارى. ەلدىڭ دامۋى مەن جاڭارۋىندا جاس بۋىننىڭ ءرولى زور. سوندىقتان دا جاستاردى مەملەكەتتىك قىزمەتكە تارتۋ — ستراتەگيالىق ماڭىزى بار ماسەلە.
«مەملەكەتتىك قىزمەتتى جاستارمەن تولىقتىرىپ، كادرلىق جاڭارۋعا جول اشۋىمىز كەرەك. بۇل – ەلدىڭ كەلەشەگىنە سالىنعان ينۆەستيتسيا»، – دەپ، پرەزيدەنت قاسىم-جومارت توقاەۆ بۇل باعىتتىڭ ماڭىزدىلىعىن بىرنەشە رەت اتاپ وتكەن بولاتىن.
بۇگىندە قازاقستاننىڭ مەملەكەتتىك قىزمەت جۇيەسى قارقىندى جاڭعىرۋ كەزەڭىندە تۇر. تسيفرلاندىرۋ، اشىقتىق، كاسىبيلىك – بۇلار ەل باسقارۋدىڭ باستى تالاپتارىنا اينالدى. مۇنداي وزگەرىستەر اياسىندا باستى نازاردا – جاستاردىڭ بەلسەندىلىگى.
بۇل باعىتتا ەلىمىزدە بىرقاتار ناقتى قادامدار جاسالىپ، زاڭنامالىق نەگىزدەر قالىپتاستىرىلعان.
جاستاردى قولداۋ بويىنشا بىرنەشە ماڭىزدى زاڭ اكتىلەرى مەن باعدارلامالار قابىلداندى.
سوڭعى وزگەرىستەرگە سايكەس، جوعارى وقۋ ورنىن ۇزدىك (GPA 3.33 كەم ەمەس) اياقتاعان تۇلەكتەرگە اۋىلدىق جانە اۋداندىق دەڭگەيدەگى تومەنگى لاۋازىمدارعا ءبىر جىل ىشىندە كونكۋرسسىز ورنالاسۋ قۇقىعى بەرىلگەن.
وزگەرىستەر ەنگىزىلگەننەن باستاپ مەملەكەتتىك قىزمەتكە 59 تۇلەك ورنالاستى.
سونىمەن قاتار، مەملەكەتتىك قىزمەتتى دامىتۋدىڭ 2024–2029 جىلدارعا ارنالعان تۇجىرىمداماسىنا سايكەس جاستاردىڭ مەملەكەتتىك قىزمەتكە بەيىمدەلۋىنە جاعداي جاساۋ، تاجىريبە جانە تاعىلىمداما جۇيەسىن زاڭنامالىق تۇرعىدا كۇشەيتۋ ماقساتى قويىلعان.
قازىرگى تاڭدا، دەپارتامەنت پەن مەملەكەتتىك باسقارۋ اكادەمياسىنىڭ وڭىرلىق فيليالىمەن 2018 جىلى «جاڭا تالاپ» مەملەكەتتىك قىزمەت مەكتىبىنىڭ اشىلىپ، جاستار اراسىندا مەملەكەتتىك قىزمەت ينستيتۋتىن تانىمالداندىرۋعا ۇلەسىن قوسۋدا. وقىتۋ شەڭبەرىڭدە تىڭداۋشىلار ماڭىزدى زاڭنامالىق اكتىلەرمەن تانىسىپ، مەملەكەتتىك ورگانداردا تاعىلىمدامادان وتەدى.
جاستاردى قولداۋ ماقساتىندا ماڭىزدى قادامداردىڭ ءبىرى – كادرلىق رەزەرۆتى قالىپتاستىرۋ. ەلىمىزدە ەكى نەگىزگى باعىتتا كادر رەزەرۆى جۇزەگە اسىرىلىپ كەلەدى: پرەزيدەنتتىك جاستار كادر رەزەرۆى جانە وڭىرلىك كادر رەزەرۆى. ەكى جوبا دا دارىندى، كاسىبي جانە جاڭاشىل ويلايتىن ازاماتتاردى مەملەكەتتىك قىزمەتكە تارتۋعا باعىتتالعان.
پرەزيدەنتتىك جاستار كادر رەزەرۆى – قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ 2019 جىلعى باستاماسىمەن ىسكە قوسىلعان ستراتەگيالىق جوبا. ماقساتى – ەلىمىزدىڭ دامۋىنا سەرپىن بەرە الاتىن جاس، ءبىلىمدى، كاسىبي مامانداردى مەملەكەتتىك باسقارۋ جۇيەسىنە تارتۋ. بۇگىندە اتالمىش رەزەرۆكە كەزەكتى ىرىكتەۋ وتكىزىلۋدە، وڭىرىمىزدەن وسى ىرىكتەۋگە 300 استام ازامات قاتىسۋدا.
وڭىرلىك كادر رەزەرۆى – وبلىستار مەن رەسپۋبليكالىق ماڭىزى بار قالالاردا جۇزەگە اسىرىلاتىن، جەرگىلىكتى مەملەكەتتىك باسقارۋعا ارنالعان رەزەرۆ. بۇل جوبا وڭىرلەرگە جاڭا كوزقاراس پەن جاڭا كۇش اكەلۋگە باعىتتالعان. اتالمىش جوباعا ىرىكتەۋ 2024 جىلى العاش رەت وتكىزىلىپ، وڭىرلىك كادر رەزەرۆىنە 30 ازامات ەنگىزىلدى جانە 50% جۇمىسقا ورنالاستى.
زاڭنامالىق اكتىلەرمەن بەكىتىلگەن مۇمكىندىكتەر مەن رەزەرۆ جۇيەسى، جەڭىلدىك شارتتارى — بارلىعى جاستارعا سەنىم ءبىلدىرۋدىڭ دالەلى.
مەملەكەتتىك قىزمەت — بۇل تەك جۇمىس ورنى ەمەس، ول ەلگە قىزمەت ەتۋدىڭ جوعارى جاۋاپكەرشىلىگى. بۇگىنگى جاستاردى قولداپ، ولاردىڭ مەملەكەتتىك باسقارۋعا ارالاسۋىنا جول اشۋ — ەلىمىزدىڭ تۇراقتى دامۋ كەپىلى.
مەملەكەتتىك قىزمەت
ىستەرى اگەنتتىگىنىڭ
باتىس قازاقستان وبلىسى
بويىنشا دەپارتامەنتى
