باتىس قازاقستان وبلىسىندا جۇمىسشى ماماندىقتار جىلىنا وراي ءداستۇرلى «ەڭبەك جولى» وبلىستىق كونكۋرسىنىڭ جەڭىمپازدارى انىقتالىپ، سالتاناتتى تۇردە ماراپاتتالدى.
جالپىعا ورتاق ەڭبەك قوعامى يدەياسىن ىلگەرىلەتۋ ماقساتىندا قر ەڭبەك جانە حالىقتى الەۋمەتتىك قورعاۋ مينيسترلىگى باستاماسىمەن ەڭبەك اۋلەتتەرى مەن ءوندىرىس جۇمىسكەرلەرى اراسىندا وتكىزىلىپ كەلە جاتقان بۇل كونكۋرس ەڭبەك ادامىنىڭ مارتەبەسىن ارتتىرۋعا باعىتتالعان.
بيىلعى «ەڭبەك جولى» كونكۋرسىنىڭ وبلىستىق كەزەڭىنە بارلىعى 38 ۇمىتكەر قاتىسىپ، ءوز ەڭبەگىمەن ءوڭىر دامۋىنا ونىڭ ىشىندە: «ۇزدىك ەڭبەك اۋلەتى» نوميناتسياسىنا – 7 ۇمىتكەر، «جۇمىس ىستەيتىن جاستاردىڭ ۇزدىك تالىمگەرى» نوميناتسياسىنا – 14 ۇمىتكەر، ء«وندىرىستىڭ ۇزدىك جاس مامانى» نوميناتسياسىنا – 17 ۇمىتكەر باق سىنادى.
سالتاناتتى جيىندا وبلىس اكىمى ناريمان تورەعاليەۆ قاتىسۋشىلاردى قۇتتىقتاپ، ەڭبەكتىڭ قوعامداعى ورنى مەن ماڭىزىنا توقتالدى.
– مەملەكەت باسشىسىنىڭ باستاماسىمەن اعىمداعى 2025 جىل – جۇمىسشى ماماندىقتار جىلى بولىپ جاريالانۋى – ماڭداي تەرىمەن ەل دامۋىنا ۇلەس قوسىپ جۇرگەن ەڭبەك ادامىن ارداقتاۋعا باعىتتالعان تاريحي قادام، – دەدى ايماق باسشىسى.
كونكۋرس جەڭىمپازدارى مەن جۇلدەگەرلەرىنە ارنايى ديپلومدار مەن سىيلىقتار تابىس ەتىلدى. ەندى ولار «ەڭبەك جولى» رەسپۋبليكالىق بايقاۋىنا وبلىس اتىنان قاتىسىپ، باتىس قازاقستاننىڭ ەڭبەك ادامىن بارشاعا تانىتپاق.
