15 قازاندا ورال قالاسىندا مۇناي-گاز ماشينا جاساۋ فورۋمى جانە وپەراتورلاردىڭ اشىق ەسىك كۇنى اياسىندا باتىس قازاقستان وبلىسىنىڭ ونەركاسىپتىك كاسىپورىندارىنا تانىسۋ ساپارلارى ۇيىمداستىرىلدى.
قاتىسۋشىلار «ۋرالسكاگرورەمماش» اق، «West Oil Engineering Company» جشس جانە «باتىس قازاقستان ماشينا جاساۋ كومپانياسى» اق وندىرىستىك الاڭدارىنا بارىپ، كاسىپورىنداردىڭ وندىرىستىك قۋاتتارى مەن وڭىردەگى ونەركاسىپتىك الەۋەتىمەن تانىستى.
دەلەگاتسيانى قازاقستان رەسپۋبليكاسى ەنەرگەتيكا ۆيتسە-ءمينيسترى ەرلان ەسەناليۇلى اقباروۆ باستاپ باردى. ساپارعا قازاقستان رەسپۋبليكاسى قۇرىلتايىنىڭ دەپۋتاتتارى، «قازمۇنايگاز» ۇك» اق باسشىلىعى، «PSA» جشس ۋاكىلەتتى ورگانىنىڭ وكىلدەرى، سونداي-اق ءىرى مۇناي-گاز وپەراتورلارىنىڭ باسشىلارى قاتىستى. ولاردىڭ قاتارىندا «تەڭىزشەۆرويل» جشس باس ديرەكتورى ۋيليام لاكوبي، «قاراشىعاناق پەتروليۋم وپەرەيتينگ ب.ۆ.» باس ديرەكتورى ماركو مارسيلي، NCOC N.V. باسقارۋشى ديرەكتورىنىڭ ورىنباسارى جاندوس ورازاليەۆ، سونداي اق IMBC باس ديرەكتورى داستان ابىشەۆ بولدى.
اتالعان زاۋىتتار مۇناي-گاز سالاسىنا ارنالعان ولشەۋ، ەسەپكە الۋ جانە اۆتوماتتاندىرۋ جۇيەلەرىن، اۆتوتسيستەرنالاردى، ءورت ءسوندىرۋ تەحنيكاسىن، مەتالل كونسترۋكتسيالارىن، سونداي-اق مۇناي-گاز سالاسىندا سۇرانىسقا يە ءىرى مۇناي-گاز جانە ەنەرگەتيكالىق جابدىقتاردى وندىرەدى.
كەزدەسۋلەر بارىسىندا زاۋىتتاردىڭ تەحنولوگيالىق مۇمكىندىكتەرى تانىستىرىلىپ، وندىرىستىك الەۋەتتى ارتتىرۋ جانە ءىرى مۇناي-گاز جوبالارىنىڭ وپەراتورلارىمەن ىنتىماقتاستىقتى كەڭەيتۋ ماسەلەلەرى تالقىلاندى.
ساپاردىڭ ۇيىمداستىرىلۋى باتىس قازاقستان وبلىسىنىڭ ونەركاسىپتىك الەۋەتى جوعارى ءوڭىر رەتىندەگى ماڭىزدىلىعىن ايقىنداپ، مەملەكەتتىك ورگاندار، وتاندىق وندىرۋشىلەر جانە ءىرى مۇناي-گاز وپەراتورلارى اراسىنداعى ارىپتەستىك بايلانىستاردى نىعايتۋعا ىقپال ەتتى.
