باتىس قازاقستاندا وبلىسىندا بوران سالدارىنان ءبىر ءۇيىر جىلقى قىرىلىپ قالعان. الەۋمەتتىك جەلىلەردە باتىس قازاقستان وبلىسى قازتالوۆ اۋدانىنداعى سارالجىن اۋىلىندا قاتتى بوران سالدارىنان قىرىلىپ قالعان جىلقىلاردىڭ ۆيدەوسى تارادى، دەپ حابارلايدى "ادىرنا".
بەينەجازبادا ەر ادام بوران كەزىندە جىلقىلاردىڭ سۋ ايدىنىندا قالىپ قويعانىن ايتادى. ونىڭ سوزىنشە، دەمالىس كۇندەرى وڭىردە بولعان قارلى داۋىل كەزىندە جانۋارلار ءدال سول جەردە تابيعي اپاتقا تاپ بولعان.
سالدارىنان ۇيىردەگى جىلقىلاردىڭ باسىم بولىگى قىرىلعان.
اتالعان اقپاراتتى قازتالوۆ اۋداندىق اكىمدىگى راستادى.
«قازىرگى ۋاقىتتا قىرىلعان مالدىڭ سانى مەن كەلتىرىلگەن شىعىن كولەمى ەسەپتەلىپ جاتىر. اۋدان اكىمدىگى تۇرعىنداردى الداعى قولايسىز اۋا رايى تۋرالى الدىن الا ەسكەرتكەن بولاتىن. مال باسىن قورادا ۇستاۋدى سۇرادىق. الايدا بارلىعى بىردەي بۇل ەسكەرتۋدى ەسكەرمەدى، سونىڭ سالدارىنان بوران كەزىندە كەيبىر مال اشىق جايىلىمدا قالىپ قويدى»، — دەپ حابارلادى اۋدان اكىمدىگىنىڭ ءباسپاسوز قىزمەتى.
