ادۆوكات ابزال قۇسپان باتىس قازاقستان وبلىسى دەنە شىنىقتىرۋ جانە سپورت باسقارماسىنىڭ بۇرىنعى باسشىسى ءمۇسلىم وڭداعانوۆتىڭ ءوز ۇيىندە ۇستالعان ساتىنە كۋا بولدى. ول ەكس-شەنەۋنىكتىڭ زاڭ اياسىندا شارتتى تۇردە مەرزىمىنەن بۇرىن بوساتىلعانىن مالىمدەدى. بۇل تۋرالى "ادىرنا" ءتىلشىسى 1991.qaz-عا سىلتەمە جاساپ حابارلايدى.
⠀
ء"مۇسلىم وڭداعانوۆ زاتتارىن جيناپ، تۇزەتۋ مەكەمەسىنە قايتا بارۋعا دايىندالىپ جاتقان. وسىعان قاراماستان، جاساق قىزمەتكەرلەرى ەسىكتى سىندىرىپ، ۇيگە باس كوكتەپ كىرىپ، ونىڭ جانۇياسىن، سونىمەن قاتار 64 جاستاعى زەينەتكەر ۇلكەن اعاسىن جەرگە جاتقىزىپ، باسىنا اۆتومات تاقادى.
⠀
ولار بولىپ جاتقا وقيعادان قورقىپ، جىلاعان كىشكەنتاي بالالارعا دا اياۋشىلىق بىلدىرمەدى. وسى جاعدايدان كەيىن كەيبىر زاتتار سىندى، ال كەيبىرەۋلەرى مۇلدە جوعالىپ كەتتى", - دەپ ارىزداندى ابزال. قۇسپان. سونىمەن قاتار ادۆوكات 135 ميلليون تەڭگە كەلتىرىلگەن شىعىننىڭ 51 ميلليون تەڭگەسىن تولەگەنىن اتاپ ءوتتى.
⠀
"زالالدىڭ جالپى سوماسىنىڭ تولەنبەگەن بولىگى 67 ميلليون تەڭگە ەمەس، ودان الدەقايدا از. مەن ۇسىنعان جانە ءىس ماتەريالدارىندا سوتتالعان باسقا ادامدارعا، بەكارىستانوۆ پەن جەتپىسوۆكە قاتىستى قاۋلى بار، ولار كەلتىرىلگەن زالالدىڭ ءبىر بولىگىن تولەپ، شارتتى تۇردە بوساتىلعان. سونداي-اق، اي سايىن ولاردىڭ جالاقىسىنىڭ ءبىر بولىگىن سوت ورىنداۋشىلارى ۇستاپ قالادى", - دەدى ءتۇسىندىردى ادۆوكات ابزال قۇسپان.
⠀
ەسكە سالا كەتسەك، بىرنەشە كۇن بۇرىن باتىس قازاقستان وبلىسى سپورت باسقارماسىنىڭ بۇرىنعى باسشىسى ءمۇسلىم وڭداعانوۆ تۇزەتۋ مەكەمەسىنەن شارتتى تۇردە مەرزىمىنەن بۇرىن بوستاندىققا شىققانى تۋرالى اقپارات شىققان ەدى. الايدا كەشە ونىڭ قايتادان قاماۋعا الىنعانى بەلگىلى بولدى.
باتىس قازاقستان وبلىسى سپورت باسقارماسىنىڭ بۇرىنعى باسشىسى 12 جىلعا باس بوستاندىعىنان ايىرىلعان بولاتىن.
"ادىرنا" ۇلتتىق پورتالى
