باتىس قازاقستان وبلىسىندا حالىقتىڭ تۇرمىس ساپاسىن ارتتىرۋ جانە الەۋمەتتىك ينفراقۇرىلىمدى جاڭعىرتۋ باعىتىندا اۋقىمدى جۇمىستار اتقارىلۋدا. 2023 جىلدان بەرى وڭىردە جالپى قۇنى 149,8 ملرد تەڭگەنى قۇرايتىن 129 جاڭا الەۋمەتتىك نىسان سالىنىپ، پايدالانۋعا بەرىلدى. ونىڭ ىشىندە 52 دەنساۋلىق ساقتاۋ، 38 ءبىلىم بەرۋ، 24 سپورت جانە 15 مادەنيەت نىسانى بار.
دەنساۋلىق ساقتاۋ سالاسىنا ەرەكشە كوڭىل بولىنۋدە. «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى اياسىندا وبلىستا 50 مەديتسينالىق نىسان پايدالانۋعا بەرىلىپ، جوسپارلانعان مىندەت تولىق ورىندالدى. سونىمەن قاتار كازتالوۆ جانە ءبورلى اۋداندارىندا اۋدانارالىق اۋرۋحانالاردىڭ قۇرىلىسى جالعاسۋدا. جاڭا نىساندار اۋىل تۇرعىندارى ءۇشىن مەديتسينالىق كومەكتىڭ قولجەتىمدىلىگىن ارتتىرۋعا مۇمكىندىك بەرەدى.
سالانىڭ كادرلىق الەۋەتى دە نىعايىپ كەلەدى. سوڭعى ءۇش جىلدا وبلىسقا 450 دارىگەر تارتىلىپ، ونىڭ 239-ى اۋىلدىق جەرلەرگە جىبەرىلدى. بيىل وڭىرگە كەلگەن 127 دارىگەردىڭ 64-ءى اۋىلداردا ەڭبەك ەتۋدە. مەديتسينالىق ينفراقۇرىلىمدى جاڭعىرتۋعا 13,3 ملرد تەڭگە ءبولىنىپ، 1259 زاماناۋي قۇرال-جابدىق ساتىپ الىندى.
ءوڭىر مەديتسيناسىنا جاڭا تەحنولوگيالار دا ەنگىزىلۋدە. ورالدا تەلەمەديتسينا ورتالىعى ىسكە قوسىلىپ، قاشىقتان كونسۋلتاتسيا بەرۋ مۇمكىندىكتەرى كەڭەيتىلدى. سونىمەن قاتار ءينسۋلتتى جەدەل دياگنوستيكالاۋعا كومەكتەسەتىن CEREBRA.AI جاساندى ينتەللەكت جۇيەسى ەنگىزىلدى. ول كومپيۋتەرلىك توموگرافيا ناتيجەلەرىن جەدەل تالداۋعا كومەكتەسىپ، دارىگەرلەرگە ەمدەۋ تاكتيكاسىن ۋاقىتىلى انىقتاۋعا مۇمكىندىك بەرەدى.
وسىلايشا، وڭىردە جاڭا مەديتسينالىق نىساندار سالۋمەن قاتار، كادرلىق الەۋەتتى كۇشەيتۋ، زاماناۋي جابدىقتارمەن قامتۋ جانە تسيفرلىق تەحنولوگيالاردى ەنگىزۋ جۇمىستارى قاتار جۇرگىزىلۋدە.
