بۇگىن ورال قالاسىنداعى تۇڭعىش پرەزيدەنت الاڭىندا 25 قازان – رەسپۋبليكا كۇنىنە وراي مەملەكەتتىك تۋ كوتەرۋ ءراسىمى ءوتتى. وعان وبلىس اكىمىنىڭ مىندەتىن اتقارۋشى تىلەپبەرگەن كايۋپوۆ، قۇقىق قورعاۋ ورگاندارىنىڭ وكىلدەرى، اسكەري قىزمەتشىلەر، قالا تۇرعىندارى مەن قوناقتارى قاتىستى.
سالتاناتتى ءراسىم قازاقستان رەسپۋبليكاسىنىڭ مەملەكەتتىك انۇرانىمەن باستالىپ، كوك بايراعىمىز بيىككە كوتەرىلدى.
رەسپۋبليكا كۇنى – ەلىمىزدىڭ ەگەمەندىك جولىنداعى تاريحي تاڭداۋىن ايشىقتايتىن، ۇلتتىق بىرلىك پەن مەملەكەتتىلىك قۇندىلىقتارىن دارىپتەيتىن مەرەكە. 1990 جىلعى 25 قازاندا قازاق كسر-ءىنىڭ مەملەكەتتىك ەگەمەندىگى تۋرالى دەكلاراتسيا قابىلدانىپ، تاۋەلسىز قازاقستاننىڭ قالىپتاسۋىنا نەگىز قالاندى.
مەملەكەت باسشىسى قاسىم-جومارت توقاەۆتىڭ باستاماسىمەن 2022 جىلى رەسپۋبليكا كۇنىنە ۇلتتىق مەرەكە مارتەبەسى قايتارىلدى. بۇل شەشىم تاريحي سانانى جاڭعىرتىپ، ەلدىك مۇرات پەن تاۋەلسىزدىك قۇندىلىقتارىنىڭ ماڭىزىن ارتتىرا ءتۇستى.
بيىلعى مەرەكە قازاقستان رەسپۋبليكاسى تاۋەلسىزدىگىنىڭ 35 جىلدىعى قارساڭىندا اتالىپ وتۋدە. وسى جىلدار ىشىندە ەلىمىز مەملەكەتتىلىگىن نىعايتىپ، قوعامدىق ءومىردىڭ ءتۇرلى سالاسىندا ماڭىزدى جەتىستىكتەرگە قول جەتكىزدى.
مەملەكەتتىك تۋ كوتەرۋ ءراسىمى پاتريوتتىق اندەر شىرقالعان مەرەكەلىك كونتسەرتتىك باعدارلامامەن جالعاستى.
