شىعىس قازاقستان وبلىسىندا جاڭعىرتۋ جۇمىستارى اياقتالعان ريددەر جانە شەمونايحا تەمىرجول ۆوكزالدارى پايدالانۋعا بەرىلدى. نىساندار مەملەكەت باسشىسىنىڭ تاپسىرماسىمەن ىسكە اسىرىلىپ جاتقان 124 تەمىرجول ۆوكزالىن جاڭعىرتۋ باعدارلاماسى اياسىندا جاڭارتىلدى.
جاڭعىرتۋ بارىسىندا ۆوكزال عيماراتتارىنىڭ قاسبەتتەرى مەن ىشكى بولمەلەرى، ينجەنەرلىك جەلىلەر، جولاۋشىلار پلاتفورمالارى جانە ىرگەلەس اۋماق تولىق جاڭارتىلدى. سونداي-اق زاماناۋي جابدىقتار مەن جيھاز ورناتىلىپ، جولاۋشىلارعا قولايلى جاعداي جاسالىپ، قىزمەت كورسەتۋ ساپاسى ارتتى.
ريددەر مەن شەمونايحا تەمىرجول ۆوكزالدارى شىعىس قازاقستان وبلىسىنىڭ ماڭىزدى كولىك نىساندارىنىڭ ءبىرى بولىپ تابىلادى. ولاردى جاڭعىرتۋ ءوڭىردىڭ كولىك ينفراقۇرىلىمىن دامىتۋعا جانە تۇرعىندار مەن قوناقتارعا كورسەتىلەتىن قىزمەت ساپاسىن جاقسارتۋعا مۇمكىندىك بەردى.
قۇرىلىس-مونتاج جۇمىستارىن «فينتەك-استانا» جشس مەن «QK SUNQAR» جشس جۇزەگە اسىردى. جاڭعىرتۋدان كەيىن ريددەر ۆوكزالىنىڭ جالپى اۋدانى 471 شارشى مەتردى، ال شەمونايحا ۆوكزالىنىڭ اۋدانى 230 شارشى مەتردى قۇرايدى.
جالپى وڭىردە باعدارلاما اياسىندا بەس تەمىرجول ۆوكزالى جاڭعىرتىلۋدا. سونىڭ ەكەۋى – ريددەر مەن شەمونايحا ۆوكزالدارى – پايدالانۋعا بەرىلدى.
ەلىمىز بويىنشا تەمىرجول ۆوكزالدارىن جاڭعىرتۋ جۇمىستارى جالعاسۋدا. بيىلعى 1 شىلدەگە دەيىن رەسپۋبليكا بويىنشا 30 جاڭعىرتىلعان ۆوكزالدى پايدالانۋعا بەرىلەدى.
