قازاقستان رەسپۋبليكاسىنىڭ تاۋەلسىزدىگىنە 35 جىلدىعىنا وراي وسكەمەن قالاسىندا مەرەكەلىك دايىندىق جۇمىستارى باستالدى.
وبلىس ورتالىعىنىڭ عيماراتتارى مەن كوشەلەرى، LED-ەكراندارى مەن كورنەكتى ورىندارى مەملەكەتتىك مەرەكەنىڭ مازمۇنىن ايشىقتايتىن بەزەندىرۋلەرمەن تولىقتىرىلىپ جاتىر. قالانىڭ ءار بولىگىندە كوك بايراق پەن ەلدىك رۋحتى دارىپتەيتىن كورنەكى بەينەلەر پايدا بولىپ، تۇرعىندار مەن قالا قوناقتارىنا ەرەكشە مەرەكەلىك كوڭىل كۇي سىيلاۋدا.
قالا كوشەلەرىندە تاۋەلسىزدىككە ارنالعان كورنەكىلىكتەر كوبەيدى
«قازاقستان تاۋەلسىزدىگىنە 35 جىل» دەگەن ارنايى جازۋى بار مەرەكەلىك بەزەندىرۋلەر وبلىس ورتالىعىنىڭ بىرقاتار ماڭىزدى اۋماعىنا ورنالاستىرىلعان. اتاپ ايتقاندا، رەسپۋبليكا الاڭىنداعى ۇلكەن LED-ەكراندا، اباي جانە اۋەزوۆ داڭعىلدارى بويىندا، جەڭىس داڭعىلىندا، ساعادات نۇرماعامبەتوۆ كوشەسىنىڭ باسىندا جانە ب. الەكساندروۆ اتىنداعى سپورت سارايىنىڭ الدىنداعى بيىك LED-ەكراندا ەل تاۋەلسىزدىگىنىڭ 35 جىلدىعىنا ارنالعان بەينەلەر كورسەتىلىپ جاتىر.
سونىمەن قاتار، مەرەكەلىك بەزەندىرۋلەر قازاقستان كوشەسىندە، قالانىڭ سول جاعالاۋىنداعى ساتباەۆ داڭعىلىنىڭ بويىندا، وبلىستىق حاليفا التاي مەشىتى ماڭىنداعى جەرۇستى جاياۋ جۇرگىنشىلەر وتكەلىنىڭ جانىندا دا ورنالاستىرىلعان. مۇنداي كورنەكىلىكتەر شاعىن اۋداندارداعى كوپشىلىك ءجيى باراتىن ورىندار مەن قالانىڭ كورىكتى نۇكتەلەرىن دە قامتىپ وتىر. وسىلايشا، تاۋەلسىزدىكتىڭ 35 جىلدىعىنا ارنالعان مەرەكەلىك بەزەندىرۋلەر تەك ورتالىق كوشەلەرمەن شەكتەلمەي، شاھاردىڭ ءار بولىگىندە كورىنىس تابۋدا. بۇل ماڭىزدى تاريحي داتانىڭ ءمانىن قالا كەڭىستىگىندە ايقىن سەزىنۋگە مۇمكىندىك بەرەدى.
كوك بايراق – ەلدىكتىڭ نىشانى
وسكەمەن قالالىق اكىمدىگىنىڭ مالىمەتىنشە، تاۋەلسىزدىكتىڭ 35 جىلدىعىنا ارنالعان جۇمىستار جىل باسىنان بەرى كەزەڭ-كەزەڭىمەن جۇرگىزىلىپ كەلەدى. سونىڭ ىشىندە قالا تۇرعىندارى مەن قوناقتارى ءجيى جينالاتىن ەرتىس جاعاسىنداعى امفيتەاتردا بيىكتىگى 35 مەتر بولاتىن ۇلكەن مەملەكەتتىك تۋ ورناتىلدى. بۇل – ەل ەگەمەندىگىنىڭ سيمۆولىن اسقاقتاتىپ، تاريحي مەرەيتويدىڭ مازمۇنىن ايشىقتايتىن ماڭىزدى نىسانداردىڭ ءبىرى. قالانىڭ كوركىن كەلتىرىپ تۇرعان بوتپاي تاۋىنداعى الىپ «قازاقستان» جازۋى، تاۋ باسىنداعى ۇلكەن مەملەكەتتىك تۋ، ەلتاڭبا مەن ءانۇرانىمىز دا ءوڭىردىڭ ەلدىك رۋحىن تانىتىپ تۇر. بۇل نىشاندار تاۋەلسىز مەملەكەت رەتىندە قالىپتاسقان قازاقستاننىڭ جەتىستىكتەرىن، ۇلتتىق بىرەگەيلىگى مەن بىرلىگىن پاش ەتەدى.
بۇدان بولەك، ءۇلبى جانە ەرتىس وزەندەرى ارقىلى وتەتىن كوپىرلەرگە، قالا ورتالىعىنداعى كوپقاباتتى ۇيلەردىڭ بالكوندارىنا مەملەكەتتىك تۋ ىلىنگەن. كوك بايراقتىڭ قالانىڭ ءار تۇسىندا جەلبىرەۋى مەرەكەلىك اتموسفەرانى كۇشەيتىپ قانا قويماي، تاۋەلسىزدىك قۇندىلىعىنا دەگەن قۇرمەتتى دە ايقىنداي تۇسەدى.
35 جىلدىق مەرەيتوي – وتكەنگە تاعزىم، بولاشاققا باعدار
تاۋەلسىزدىك – قازاقستان حالقىنىڭ ەڭ باستى قۇندىلىعى، ەلدىڭ دەربەس دامۋ جولىن ايقىنداعان تاريحي بەلەس. وسى جىلدار ىشىندە مەملەكەتىمىز ساياسي، ەكونوميكالىق جانە الەۋمەتتىك باعىتتاردا اۋقىمدى وزگەرىستەردى باستان وتكەرىپ، حالىقارالىق ارەنادا وزىندىك ورنى بار ەلگە اينالدى. ال شىعىس قازاقستان ءۇشىن بۇل كەزەڭ ءوڭىردىڭ وندىرىستىك الەۋەتىن ساقتاپ، ينفراقۇرىلىمىن جاڭعىرتۋ، تۋريزم مەن اۋىل شارۋاشىلىعىن دامىتۋ، تۇرعىنداردىڭ ءومىر ساپاسىن جاقسارتۋ جولىنداعى ماڭىزدى بەلەستەرمەن ساباقتاس.
سوندىقتان تاۋەلسىزدىكتىڭ 35 جىلدىعىنا وراي ۇيىمداستىرىلىپ جاتقان بەزەندىرۋ جانە ناسيحات جۇمىستارىنىڭ ماڭىزى ەرەكشە. ولار مەرەكەنىڭ جاقىنداعانىن بىلدىرەتىن كورنەكى شارالار عانا ەمەس، سونىمەن بىرگە جاس ۇرپاقتىڭ بويىندا وتانسۇيگىشتىك سەزىمدى قالىپتاستىرۋعا، مەملەكەتتىك رامىزدەرگە قۇرمەتتى ارتتىرۋعا جانە ەل تاريحىنا دەگەن قىزىعۋشىلىقتى كۇشەيتۋگە ىقپال ەتەدى. كەندى التايدىڭ باس قالاسى وسكەمەننىڭ مەرەكەگە ساي تۇرلەنۋى – تاۋەلسىزدىككە دەگەن ورتاق قۇرمەتتىڭ كورىنىسى. قالا كوشەلەرىندەگى كوك بايراقتار مەن LED-ەكراندارداعى مەرەكەلىك بەينەلەر ءار تۇرعىنعا ازات ەلدىڭ ازاماتى بولۋدىڭ جاۋاپكەرشىلىگى مەن ماقتانىشىن سەزىندىرەدى. ايتا كەتەيىك، قازاقستان رەسپۋبليكاسىنىڭ تاۋەلسىزدىك كۇنى 16 جەلتوقساندا اتاپ وتىلەدى. بيىل ەلىمىزدىڭ تاۋەلسىزدىگىن جاريالاعانىنا 35 جىل تولادى.
