شىعىس قازاقستان وبلىسىندا ايۋ ادامعا شابۋىل جاساپ، 58 جاستاعى ەر ادام اۋىر جاراقات الدى. وقيعا ريددەر قالاسىنىڭ ماڭىندا، باتىس التاي مەملەكەتتىك تابيعي قورىعىنا جاقىن ورنالاسقان دەمالىس بازاسىنىڭ جانىنداعى ومارتادا بولعان. بۇل تۋرالى YKnews جازدى، دەپ حابارلايدى "ادىرنا".
وقيعا شىلدە ايىنىڭ سوڭىندا تىركەلگەن. ايۋ شابۋىل جاساعان كەزدە ەر اداممەن بىرگە بولعان ەكى ازامات وعان جىرتقىشتان قورعانۋعا كومەكتەسكەن. وسى ساتتەن كەيىن ايۋ ورمانعا قاشىپ كەتكەن.
جاراقات العان ازامات بىرنەشە كۇن جانساقتاۋ بولىمىندە ەمدەلىپ، كەيىن تراۆماتولوگيا بولىمىنە اۋىستىرىلعان. دارىگەرلەر ونىڭ باسى، قولى مەن اياعىندا كوپتەگەن جاراقات بارىن انىقتاعان. سونىمەن قاتار ەر ادامنىڭ قولى مەن اياعىندا ىعىسۋمەن اسقىنعان اشىق سىنىقتار بولعان.
19 تامىزدا ناۋقاس اۋرۋحانادان شىعارىلىپ، قازىرگى ۋاقىتتا ءۇي جاعدايىندا ەم قابىلداپ جاتىر.
ورمان جانە اڭشىلىق شارۋاشىلىعى جەدەل ارەكەت ەتۋ جاساعىنىڭ باستىعى ورىنباسارى سەرگەي كارماننيكوۆتىڭ ايتۋىنشا، وقيعادان كەيىن ينسپەكتورلار قارۋ الىپ، وقيعا ورنىنا بارعان. ماماندار ادامعا شابۋىل جاساعان ايۋدى اتىپ جويعان. قازىر اۋماقتا قاۋىپ جوق.
مامان ايۋدىڭ ادامعا نە سەبەپتى شابۋىل جاساعانىن ناقتى ايتا المايتىنىن جەتكىزدى. ونىڭ سوزىنشە، بيىل تۇرعىنداردان ايۋلاردىڭ ەلدى مەكەندەرگە جاقىنداۋىنا بايلانىستى شاعىمدار كوبەيگەن. ينسپەكتورلار مۇنداي جاعدايلاردا وقيعا ورنىنا بارىپ، جىرتقىشتاردى ادامداردان اۋلاق ۇستاۋعا تىرىسادى. الايدا ادام ومىرىنە تىكەلەي قاۋىپ تونگەن جاعدايدا عانا ايۋدى اتۋعا رۇقسات ەتىلەدى.
كارماننيكوۆتىڭ ايتۋىنشا، سوڭعى ۋاقىتتا ايۋلاردىڭ مالعا شابۋىل جاساعان جاعدايلارى دا كەزدەسكەن. كەيدە تۇرعىندار جىرتقىشتارعا تىم جاقىن جەردەن تاپ بولىپ جاتادى. دەگەنمەن ماماننىڭ تاجىريبەسىندە بۇل — ايۋدىڭ ادامعا جاساعان العاشقى شابۋىلى.
ماماندار شىعىس قازاقستان وبلىسىندا ايۋ سانىنىڭ ارتقانىن دا اتاپ وتىر. وتكەن جىلى ينسپەكتورلار ۇرعاشى ايۋلاردىڭ بىرنەشەۋى ەكى-ءۇش قونجىقتان تۋعانىن بايقاعان.
سونىمەن قاتار ورمانداعى تابيعي قورەكتىڭ ازايۋى جىرتقىشتاردىڭ ادامدارعا جاقىن اۋماقتارعا ءجيى شىعۋىنا اسەر ەتىپ وتىر. وتكەن جانە بيىلعى جىلدارى اياز بەن قۋاڭشىلىق سالدارىنان ورمانداعى جيدەك پەن بالقاراعاي جاڭعاعى وتە از بولعان. سونىڭ سالدارىنان ايۋلار قورەك ىزدەپ قوقىس ورىندارىنا، قاراۋسىز قالعان ساياجايلار مەن باقشالارعا جاقىنداي باستاعان.
