ۇلتتىق دومبىرا كۇنى قارساڭىندا ۇلان اۋدانىنداعى بالالار مۋزىكا مەكتەبىنىڭ اۋماعىندا ۇلتتىق مۋزىكالىق مۇراعا ارنالعان شاعىن ساۋلەت نىسانىنىڭ سالتاناتتى اشىلۋ ءراسىمى ءوتتى. بۇل نىسان قازاق حالقىنىڭ مادەنيەتى مەن سالت-داستۇرىنە دەگەن قۇرمەتتىڭ تاعى ءبىر ايقىن بەلگىسىنە اينالماق.
سالتاناتتى شاراعا اۋدان اكىمىنىڭ ورىنباسارى م. ءپىرجانوۆ، قاسىم قايسەنوۆ كەنتى اقساقالدار كەڭەسىنىڭ توراعاسى ا. ۋاليەۆ، وسكەمەن قالاسىنداعى شىعىس قازاقستان وبلىستىق مامانداندىرىلعان ء«بىلىم-يننوۆاتسيا» ليتسەيىنىڭ ديرەكتورى و. راحمان، وبلىستىق قوعامدىق كەڭەستىڭ توراعاسى ا. ءاشىموۆا، سونداي-اق قوعام وكىلدەرى، ۇستازدار، وقۋشىلار جانە اۋدان تۇرعىندارى قاتىستى.
جينالعان قاۋىمدى ۇلتتىق دومبىرا كۇنىمەن قۇتتىقتاعان قۇرمەتتى قوناقتار دومبىرانىڭ جاي عانا مۋزىكالىق اسپاپ ەمەس، ۇلتتىق بولمىستىڭ، رۋحاني بايلىقتىڭ جانە ۇرپاقتار ساباقتاستىعىنىڭ ماڭىزدى سيمۆولى ەكەنىن اتاپ ءوتتى. قۇتتىقتاۋ سوزدەرىنەن كەيىن جاڭا نىساننىڭ اشىلۋىن بىلدىرەتىن ءداستۇرلى لەنتا قيۋ ءراسىمى ءوتتى.
مەرەكەنىڭ كوركىن بالالار مۋزىكا مەكتەبىنىڭ ۇستازدارى مەن تاربيەلەنۋشىلەرىنىڭ ونەرى ايشىقتاي ءتۇستى. ولاردىڭ ورىنداۋىندا ۇلى دالانىڭ تاريحى مەن رۋحىن، حالىقتىڭ بولمىسىن بەينەلەيتىن ايگىلى قازاق كۇيلەرى شىرقالدى. دومبىرانىڭ قوڭىر ءۇنى مەرەكەگە ەرەكشە ءسان بەرىپ، ۇلتتىق مادەنيەتتىڭ بايلىعى مەن ماڭگىلىك قۇندىلىعىن تاعى ءبىر مارتە پاش ەتتى.
ۇلتتىق دومبىرا كۇنى قارساڭىندا جاڭا نىساننىڭ اشىلۋى اۋداننىڭ مادەني ومىرىندەگى ماڭىزدى وقيعاعا اينالدى. وسىنداي يگى باستامالار ۇلتتىق مۇرانى ساقتاپ، كەڭىنەن ناسيحاتتاۋعا، جاستاردىڭ ءداستۇرلى ونەرگە دەگەن قۇرمەتىن ارتتىرۋعا جانە اتا-بابادان امانات بولعان رۋحاني قۇندىلىقتاردى كەلەر ۇرپاققا جەتكىزۋگە زور ۇلەس قوسادى.
