شىعىس قازاقستان وبلىسىنىڭ اكىمى نۇرىمبەت ساقتاعانوۆ Tengrinews.kz سايتىنا بەرگەن سۇحباتىندا وسكەمەندە 600 ميلليون تەڭگەگە جوندەلگەن كوپىر قيراعاننان كەيىن ول بىردەن قۇقىق قورعاۋ ورگاندارىنىڭ باسشىلارىن جيناپ، جول سالاسىنا كەشەندى تەكسەرۋ جۇرگىزۋدى، اسىرەسە سىبايلاس جەمقورلىق تاۋەكەلدەرىنە ەرەكشە نازار اۋدارۋدى تاپسىرعانىن ايتتى.
تەكسەرۋ بارىسىندا شقو جولاۋشى كولىگى جانە اۆتوموبيل جولدارى باسقارماسىنىڭ باسشىسى دانيار ۋاحيتوۆ ۇستالدى. اكىمنىڭ ايتۋىنشا، ول بىردەن قىزمەتىنەن بوساتىلعان. سونىمەن قاتار نۇرىمبەت ساقتاعانوۆ ۋاحيتوۆتىڭ كوپىرگە قاتىستى ىسكە ەمەس، قازىرگى تاڭدا قۇقىق قورعاۋ ورگاندارى تەرگەپ جاتقان باسقا ەپيزود بويىنشا كۇدىككە ىلىنگەنىن ناقتىلادى.
بۇدان بولەك، اكىم بۇرىنعى شەنەۋنىكپەن جەكە قارىم-قاتىناسى بار دەگەن قاۋەسەتتەرگە دە توقتالدى. تاعايىنداۋ كونكۋرس راسىمدەرى اياسىندا جۇرگىزىلگەن، ال ۋاحيتوۆ باستاپقىدا ءوزىن جۇمىسقا قابىلەتتى مامان رەتىندە كورسەتكەن. الايدا ول كورسەتىلگەن سەنىمدى اقتاماعان.
«ادامدار التىندى كورگەندە – دۇرىس جولدان تايىپ كەتەدى»، - دەدى نۇرىمبەت ساقتاعانوۆ. ونىڭ ايتۋىنشا، بۇل جاعداي ءوزى ءۇشىن ماڭىزدى باسقارۋشىلىق ساباق بولدى جانە ەندى سىبايلاس جەمقورلىق قاۋپى جوعارى سالالارعا باسشى تاعايىنداۋ تالاپتارى كۇشەيتىلە تۇسەدى.
كوپىردىڭ قيراۋ سەبەپتەرىنە توقتالعان ايماق باسشىسى ساراپتامانىڭ تۇپكىلىكتى قورىتىندىلارى ءالى دايىن ەمەس ەكەنىن ايتتى. ىقتيمال فاكتورلار قاتارىندا سۋ دەڭگەيىنىڭ كۇرت كوتەرىلۋى مەن 1940-جىلدارى سالىنعان كوپىردىڭ توزۋى دا قاراستىرىلىپ جاتىر. سونداي-اق ول ەسكى كوپىر قالپىنا كەلتىرىلمەيتىنىن، ونىڭ ورنىنا جاڭا كوپىر سالىناتىنىن جەتكىزدى.
