Şyǧys Qazaqstan oblysynyŋ äkımı Nūrymbet Saqtaǧanov Tengrinews.kz saityna bergen sūhbatynda Öskemende 600 million teŋgege jöndelgen köpır qiraǧannan keiın ol bırden qūqyq qorǧau organdarynyŋ basşylaryn jinap, jol salasyna keşendı tekseru jürgızudı, äsırese sybailas jemqorlyq täuekelderıne erekşe nazar audarudy tapsyrǧanyn aitty.
Tekseru barysynda ŞQO jolauşy kölıgı jäne avtomobil joldary basqarmasynyŋ basşysy Daniiar Uahitov ūstaldy. Äkımnıŋ aituynşa, ol bırden qyzmetınen bosatylǧan. Sonymen qatar Nūrymbet Saqtaǧanov Uahitovtyŋ köpırge qatysty ıske emes, qazırgı taŋda qūqyq qorǧau organdary tergep jatqan basqa epizod boiynşa küdıkke ılıngenın naqtylady.
Būdan bölek, äkım būrynǧy şeneunıkpen jeke qarym-qatynasy bar degen qauesetterge de toqtaldy. Taǧaiyndau konkurs räsımderı aiasynda jürgızılgen, al Uahitov bastapqyda özın jūmysqa qabılettı maman retınde körsetken. Alaida ol körsetılgen senımdı aqtamaǧan.
«Adamdar altyndy körgende – dūrys joldan taiyp ketedı», - dedı Nūrymbet Saqtaǧanov. Onyŋ aituynşa, būl jaǧdai özı üşın maŋyzdy basqaruşylyq sabaq boldy jäne endı sybailas jemqorlyq qaupı joǧary salalarǧa basşy taǧaiyndau talaptary küşeitıle tüsedı.
Köpırdıŋ qirau sebepterıne toqtalǧan aimaq basşysy saraptamanyŋ tüpkılıktı qorytyndylary älı daiyn emes ekenın aitty. Yqtimal faktorlar qatarynda su deŋgeiınıŋ kürt köterıluı men 1940-jyldary salynǧan köpırdıŋ tozuy da qarastyrylyp jatyr. Sondai-aq ol eskı köpır qalpyna keltırılmeitının, onyŋ ornyna jaŋa köpır salynatynyn jetkızdı.
