7 aqpanda IIM men UQK qyzmetkerleri Almaty qalasynda quramynda belgili «Aıshýaq-Jantúgel» uıymdasqan qylmystyq tobynyń músheleri bar topty quryqtady, dep habarlaıdy “Adyrna” ulttyq portaly.
Polisia.kz málimetinshe, jedel-tergeý is-sharalarynyń nátıjesinde 14 adam ustaldy. 7 atys jáne travmatıkalyq qarý, 4 granata, 200-den astam oq-dári, esirtki zaty, sondaı-aq basqa da sýyq qarý tárkilendi. Top músheleri kásipkerlerge ózderiniń krımınaldyq «qamqorlyǵyn» kórsete otyryp, olardy bopsalaýmen aınalysqany anyqtaldy. Olar Almaty qalasynyń temir jol vokzaldary aýmaǵynda, sondaı-aq bazarlarynda óz yqpalyn júrgizgen.
«Ustalǵan adamdarǵa qatysty Almaty qalasy PD tergeý basqarmasy bopsalaý jáne bas bostandyǵynan zańsyz aıyrý faktileri boıynsha birneshe qylmystyq isti tergeýdi bastady», – dedi QR IIM uıymdasqan qylmysqa qarsy kúres departamentiniń basqarma bastyǵy Qýandyq Alpys.
Sol kúni polıııa kúshimen Stepnogorsk qalasynda osyǵan uqsas ustaý júrgizildi. Jedel jumystyń nátıjesinde qorqytý jáne kúsh kórsetý arqyly qalanyń turǵyndaryn bopsalaýmen aınalysqan jergilikti krımınalıtettiń qatarynan turatyn toptyń joly kesildi.
«Qylmystyq toptyń barlyq músheleri ustalyp, ýaqytsha ustaý ızolıatoryna qamaldy. Olarǵa qatysty Aqmola oblysy PD tergeý basqarmasy bopsalaý faktileri boıynsha 6 qylmystyq isti tergep jatyr. Kórsetilgen faktiler boıynsha ózge málimetter tergeý múddesinde jarııalanbaıdy», – dedi Qýandyq Alpys.
