7 مامىر – وتان قورعاۋشى كۇنىنە وراي وبلىس ورتالىعىنداعى ساعادات نۇرماعامبەتوۆ ەسكەرتكىشىنە گۇل شوقتارىن قويۋ ءراسىمى ءوتتى. وعان ايماق باسشىسى نۇرىمبەت ساقتاعانوۆ، قۇقىق قورعاۋ ورگاندارىنىڭ باسشىلارى، اسكەريلەر، ءتۇرلى سالا مەن ۇيىمدار وكىلدەرى، «جاس سارباز» اسكەري-پاتريوتتىق كلۋبتارىنىڭ مۇشەلەرى مەن جاستار قاتىستى.
«بۇگىن ءبىز ەل تىنىشتىعى مەن بەيبىت ءومىردىڭ ساقتالۋىنا ۇلەس قوسىپ جۇرگەن ازاماتتارعا قۇرمەت كورسەتىپ، ەرلىگى اڭىزعا اينالعان باتىر بابالارىمىزدىڭ داڭقتى جولىن كەيىنگى ۇرپاققا ۇلگى ەتەمىز. وتان قورعاۋ – قاسيەتتى پارىز ءارى ۇلكەن جاۋاپكەرشىلىك. سوندىقتان بۇل مەرەكە ءار ازامات ءۇشىن ەرەكشە مانگە يە. سالتاناتتى جيىننىڭ كەڭەس وداعىنىڭ باتىرى، حالىق قاھارمانى ساعادات قوجاحمەتۇلى نۇرماعامبەتوۆ ەسكەرتكىشى جانىندا ءوتۋىنىڭ سيمۆولدىق ماڭىزى زور. ول مايدان دالاسىندا ەرلىك كورسەتىپ، ەل باسىنا كۇن تۋعان شاقتا باتىرلىقتىڭ بيىك ۇلگىسىن تانىتتى»، - دەدى وبلىس اكىمى.
نۇرىمبەت ساقتاعانوۆ ءوز سوزىندە بۇگىنگى ساربازدار مەن وفيتسەرلەر – وسى داڭقتى جولدىڭ لايىقتى جالعاستىرۋشىلارى ەكەندىگىن جەتكىزدى.
ودان سوڭ جەمىستى ەڭبەك ەتىپ جۇرگەن اسكەريلەر، قۇقىق قورعاۋ ورگاندارى مەن تجد قىزمەتكەرلەرى مەرەكەگە وراي وبلىس اكىمىنىڭ العىس حاتتارىمەن ماراپاتتالدى. شارا سوڭىندا جينالعاندار ەسكەرتكىشكە گۇل شوقتارىن قويدى.
