شىعىس قازاقستان وبلىسى زايسان اۋدانىنداعى اۋىل اكىمى جەرگىلىكتى تۇرعىندارمەن كەزدەسۋ بارىسىندا بالاعات سوزدەر ايتقان. وقيعانىڭ بەينەجازباسى الەۋمەتتىك جەلىدە تارادى، دەپ حابارلايدى «ادىرنا» ءتىلشىسى.
ۆيدەودان اۋىل تۇرعىندارىنىڭ اكىمنىڭ قابىلداۋىنا كەلىپ، ونىڭ قىزمەتىنە قاتىستى سۇراقتار قويعانىن كورۋگە بولادى. اڭگىمە بارىسىندا تاراپتار اراسىندا جانجال تۋىنداپ، اكىم ءوزىن ۇستاي الماي، بەيادەپ ءسوز ايتقان.
7 قازان كۇنى وبلىس اكىمدىگىنىڭ ءباسپاسوز قىزمەتى بۇل جاعداي بويىنشا اۋىل اكىمىنەن رەسمي تۇسىنىكتەمە تالاپ ەتىلگەنىن مالىمدەدى.
«شىعىس قازاقستان وبلىسىنىڭ اكىمدىگى بۇل ماتەريالداردى مەملەكەتتىك قىزمەت ىستەرى اگەنتتىگىنىڭ ادەپ جونىندەگى كەڭەسىنە جولدادى. وندا قىزمەتتىك ادەپ نورمالارىنىڭ بۇزىلۋ ماسەلەسى قارالادى. مۇنداي ارەكەتتەرگە جول بەرىلمەۋى ءتيىس. وبلىس باسشىلىعى بىلاپىت ءسوز قولدانۋعا، ادەپسىز قىلىق تانىتۋعا تۇبەگەيلى قارسى. وسى رەتتە، ەتيكالىق نورمالاردى بۇزعان مەملەكەتتىك قىزمەتشىلەرگە قاتاڭ جازا قولدانىلاتىنىن ەسكەرتەمىز»،—دەلىنگەن حابارلامادا.
