استانادا اۆتوكولىك ءدامحانالاردىڭ ءبىرىنىڭ تەرەزەسىنە سوعىلدى. وقيعا كەزىندە كولىك تىزگىنىندە كامەلەتكە تولماعان بالا بولعان. بۇل تۋرالى Tengrinews.kz جازدى، دەپ حابارلايدى "ادىرنا".
اقپاراتقا سايكەس، وقيعا ەلوردانىڭ وڭ جاعالاۋىندا بولعان.
استانا قالالىق پوليتسيا دەپارتامەنتىنىڭ ءباسپاسوز قىزمەتىنىڭ مالىمەتىنشە، جول-كولىك وقيعاسى وتكەن جۇمادا بولعان.
پوليتسيانىڭ حابارلاۋىنشا، Daimler Chrysler ماركالى اۆتوكولىكتىڭ جۇرگىزۋشىسى كولىگىن قاراۋسىز قالدىرىپ، دۇكەنگە كىرىپ كەتكەن. وسى ساتتە ونىڭ كامەلەتكە تولماعان ۇلى كولىككە وتىرىپ، قوزعالتقىشىن وتالدىرعان. سونىڭ سالدارىنان اۆتوكولىك قوزعالىپ كەتىپ، ءدامحانالاردىڭ ءبىرىنىڭ عيماراتىنا سوعىلىپ، تەرەزەسىن سىندىرعان.
وقيعا سالدارىنان ەشكىم زارداپ شەككەن جوق. الايدا كولىك يەسى اكىمشىلىك جاۋاپكەرشىلىككە تارتىلدى.
سونىمەن قاتار ول كامەلەتكە تولماعان بالاسىن تاربيەلەۋ جونىندەگى مىندەتتەرىن تيىسىنشە ورىنداماعانى ءۇشىن دە جاۋاپقا تارتىلادى. دامحاناعا كەلتىرىلگەن ماتەريالدىق شىعىندى كولىك يەسى وتەۋگە ءتيىس.
پوليتسيا قىزمەتكەرلەرى اتا-انالارعا قاۋىپسىزدىك تالاپتارىن ساقتاپ، بالالارىن كولىكتە قاراۋسىز قالدىرماۋدى ەسكەرتتى.
