قازاقستان مەن وزبەكستان اراسىندا جاڭا تەمىرجول جەلىسى اشىلدى. بۇل تۋرالى ۇكىمەتتىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
اڭگىمە داربازا – ماقتاارال تەمىرجول جەلىسى تۋرالى بولىپ وتىر. ونىڭ بويىمەن پويىز قوزعالىسىنىڭ باستالعانى 4 قاراشادا پرەمەر-مينيستر ولجاس بەكتەنوۆتىڭ توراعالىعىمەن وتكەن «سامۇرىق-قازىنا» قورى ديرەكتورلار كەڭەسىنىڭ وتىرىسىندا جاريالاندى.
قازاقستان مەن وزبەكستان اراسىنداعى جاڭا تەمىرجول جەلىسى قوردىڭ قاتىسۋىمەن جۇزەگە اسىرىلعان ماڭىزدى جوبالاردىڭ ءبىرى رەتىندە اتالدى. ماگيسترالدىڭ ىسكە قوسىلۋى تەمىرجول جەلىسىنىڭ وتكىزۋ قابىلەتىن ارتتىرۋعا، جۇك تاسىمالى كولەمىن ۇلعايتۋعا جانە قازاقستاندىق ونىمدەردىڭ ورتالىق ازيا ەلدەرىنە ەكسپورتتىق باعىتتارىن كەڭەيتۋگە مۇمكىندىك بەرەدى.
داربازا – ماقتاارال تەمىرجول جەلىسىنىڭ قۇرىلىسى 2023 جىلدىڭ قاراشا ايىنىڭ سوڭىندا باستالعان. نەگىزگى جولداردىڭ ۇزىندىعى – 127,6 شاقىرىم، ال تەمىرجول توسەمىنىڭ جالپى ۇزىندىعى شامامەن 152 شاقىرىمدى قۇرايدى. جوبانىڭ قۇنى 286 ملرد تەڭگەگە (شامامەن 545,7 ملن دوللار) باعالانعان.
جوبا اياسىندا وزبەكستانمەن شەكارادا «سىرداريا» تەمىرجول ستانتسياسىنا شىعاتىن جاڭا وتكىزۋ پۋنكتىن اشۋ دا قاراستىرىلعان.
جوبا مەملەكەت باسشىسى قاسىم-جومارت توقاەۆتىڭ تاپسىرماسى بويىنشا جۇزەگە اسىرىلدى. ول وزبەكستانمەن اراداعى قوسىمشا حالىقارالىق تەمىرجول باعىتىن قالىپتاستىرىپ، جۇكتەمەسى جوعارى سارىاعاش – تاشكەنت ۋچاسكەسىندەگى كولىك قوزعالىسىن جەڭىلدەتۋگە مۇمكىندىك بەرەدى. بولجام بويىنشا، جاڭا تەمىرجول ۋچاسكەسى جىلىنا 20 ملن تونناعا دەيىن جۇك تاسىمالداي الادى.
بۇعان دەيىن كولىك مينيسترلىگى جەلى بويىنشا جۇمىس قوزعالىسىن بيىلعى جىلدىڭ سوڭىنا دەيىن اشۋ جوسپارلانىپ وتىرعانىن حابارلاعان بولاتىن.
قازاقستان باسشىلىعى ەلدىڭ ترانزيتتىك الەۋەتىن ارتتىرۋ نيەتىن بىرنەشە رەت مالىمدەگەن ەدى. اتاپ ايتقاندا، 2025 جىلدىڭ جەلتوقسانىندا الماتىنى اينالىپ وتەتىن جەتىگەن – قازىبەك بەك تەمىرجول جەلىسى بويىنشا قوزعالىس اشىلدى. ۇزىندىعى 75 شاقىرىمدى قۇرايتىن ماگيسترال الماتى تەمىرجول تورابىنا تۇسەتىن جۇكتەمەنى ازايتىپ، قىتايدان ەۋروپا مەن ورتالىق ازيا ەلدەرىنە جۇك جەتكىزۋ ۋاقىتىن قىسقارتۋعا باعىتتالعان.
