Qazaqstan men Özbekstan arasynda jaŋa temırjol jelısı aşyldy. Būl turaly Ükımettıŋ baspasöz qyzmetı jazdy, dep habarlaidy «Adyrna» tılşısı.
Äŋgıme Darbaza – Maqtaaral temırjol jelısı turaly bolyp otyr. Onyŋ boiymen poiyz qozǧalysynyŋ bastalǧany 4 qaraşada premer-ministr Oljas Bektenovtıŋ töraǧalyǧymen ötken «Samūryq-Qazyna» qory direktorlar keŋesınıŋ otyrysynda jariialandy.
Qazaqstan men Özbekstan arasyndaǧy jaŋa temırjol jelısı qordyŋ qatysuymen jüzege asyrylǧan maŋyzdy jobalardyŋ bırı retınde ataldy. Magistraldıŋ ıske qosyluy temırjol jelısınıŋ ötkızu qabıletın arttyruǧa, jük tasymaly kölemın ūlǧaituǧa jäne qazaqstandyq önımderdıŋ Ortalyq Aziia elderıne eksporttyq baǧyttaryn keŋeituge mümkındık beredı.
Darbaza – Maqtaaral temırjol jelısınıŋ qūrylysy 2023 jyldyŋ qaraşa aiynyŋ soŋynda bastalǧan. Negızgı joldardyŋ ūzyndyǧy – 127,6 şaqyrym, al temırjol tösemınıŋ jalpy ūzyndyǧy şamamen 152 şaqyrymdy qūraidy. Jobanyŋ qūny 286 mlrd teŋgege (şamamen 545,7 mln dollar) baǧalanǧan.
Joba aiasynda Özbekstanmen şekarada «Syrdariia» temırjol stansiiasyna şyǧatyn jaŋa ötkızu punktın aşu da qarastyrylǧan.
Joba memleket basşysy Qasym-Jomart Toqaevtyŋ tapsyrmasy boiynşa jüzege asyryldy. Ol Özbekstanmen aradaǧy qosymşa halyqaralyq temırjol baǧytyn qalyptastyryp, jüktemesı joǧary Saryaǧaş – Taşkent uchaskesındegı kölık qozǧalysyn jeŋıldetuge mümkındık beredı. Boljam boiynşa, jaŋa temırjol uchaskesı jylyna 20 mln tonnaǧa deiın jük tasymaldai alady.
Būǧan deiın Kölık ministrlıgı jelı boiynşa jūmys qozǧalysyn biylǧy jyldyŋ soŋyna deiın aşu josparlanyp otyrǧanyn habarlaǧan bolatyn.
Qazaqstan basşylyǧy eldıŋ tranzittık äleuetın arttyru nietın bırneşe ret mälımdegen edı. Atap aitqanda, 2025 jyldyŋ jeltoqsanynda Almatyny ainalyp ötetın Jetıgen – Qazybek bek temırjol jelısı boiynşa qozǧalys aşyldy. Ūzyndyǧy 75 şaqyrymdy qūraityn magistral Almaty temırjol torabyna tüsetın jüktemenı azaityp, Qytaidan Europa men Ortalyq Aziia elderıne jük jetkızu uaqytyn qysqartuǧa baǧyttalǧan.
