قازاقستاننىڭ وڭتۇستىك وڭىرلەرىندە 14 تامىزدا بولعان ەلەكتر قۋاتىنىڭ جاپپاي ۇزىلۋىنە قىرعىزستانداعى توقتوعۇل گەس-ىندە ەكى گيدروگەنەراتوردىڭ ىستەن شىعۋى سەبەپ بولعان. بۇل تۋرالى KEGOC كومپانياسى مالىمدەدى، دەپ حابارلايدى “ادىرنا”.
كومپانيانىڭ حابارلاۋىنشا، اقاۋ ساعات 14:37-دە تىركەلگەن. سونىڭ سالدارىنان قازاقستاننىڭ بىرىڭعاي ەلەكتر ەنەرگەتيكالىق جۇيەسىندەگى «سولتۇستىك-شىعىس-وڭتۇستىك» ترانزيتىنە شامادان تىس جۇكتەمە ءتۇسىپ، وڭتۇستىك ايماق ەلدىڭ ەنەرگوجۇيەسىنەن، سونداي-اق قىرعىزستان، وزبەكستان جانە تاجىكستاندى بىرىكتىرەتىن ورتالىق ازيانىڭ ورتاق ەنەرگوجۇيەسىنەن اجىراعان.
اپات سالدارىنان الماتى، جامبىل، تۇركىستان، قىزىلوردا جانە جەتىسۋ وبلىستارىندا ەلەكتر قۋاتى ۋاقىتشا توقتادى. بۇدان بولەك، قاراعاندى، ۇلىتاۋ جانە اباي وبلىستارىندا دا ەلەكترمەن جابدىقتاۋدا ىركىلىستەر تىركەلدى.
KEGOC مالىمەتىنشە، قازىرگى ۋاقىتتا اتالعان وڭىرلەردىڭ بارلىعىندا ەلەكترمەن جابدىقتاۋ تولىق قالپىنا كەلتىرىلدى.
الدىن الا اقپارات بويىنشا، ەلەكتر جۇيەسىندەگى اقاۋ ورتالىق ازيانىڭ بىرنەشە مەملەكەتىنە اسەر ەتكەن. قازاقستاننىڭ وڭتۇستىگىندە جارىق وشكەننەن كەيىن قىرعىزستان، وزبەكستان جانە تاجىكستان تۇرعىندارى دا ەلەكتر ەنەرگياسىنا قاتىستى پروبلەمالار تۋرالى حابارلاعان.
وزبەكستاندا بولعان اۋقىمدى ەلەكتر ءۇزىلىسىن كەيبىر جەرگىلىكتى اقپارات قۇرالدارى مەن الەۋمەتتىك جەلى قولدانۋشىلارى قازاقستانداعى اپاتپەن بايلانىستىردى. الايدا قازاقستاننىڭ ەنەرگەتيكا مينيسترلىگى وزبەكستانداعى جاعدايعا قازاقستان ەنەرگوجۇيەسى سەبەپ بولدى دەگەن اقپاراتتى جوققا شىعاردى.
الماتىدا ەلەكتر قۋاتى شامامەن ساعات 15:00 كەزىندە قالانىڭ بىرنەشە اۋدانىندا ءوشتى. ارتىنشا الماتى وبلىسىنىڭ بىرقاتار ەلدى مەكەندەرىندە دە جارىق سونگەنى تۋرالى اقپارات تارادى.
ەنەرگەتيكا مينيسترلىگىنىڭ تۇسىندىرۋىنشە، ورتالىق ازيا ەنەرگوجۇيەسى تاراپىنان ەلەكتر ەنەرگياسى اعىنىنىڭ كۇرت وزگەرۋى سالدارىنان جۇيەدە قۋاتتىڭ كۇرت ارتۋى بايقالعان. وسى كەزدە اپاتقا قارسى اۆتوماتيكا ىسكە قوسىلىپ، قاۋىپسىزدىكتى قامتاماسىز ەتۋ ءۇشىن بىرنەشە وڭىردەگى تۇتىنۋشىلاردىڭ ءبىر بولىگى جەلىدەن ۋاقىتشا اجىراتىلعان.
ەلەكتر قۋاتىنىڭ ءۇزىلۋى الماتىداعى كۇندەلىكتى تىرشىلىككە دە اسەر ەتتى. بىرقاتار باعدارشام جۇمىسىن توقتاتىپ، قالانىڭ كەي كوشەلەرىندە كولىك كەپتەلىسى پايدا بولدى. پوليتسيا قىزمەتكەرلەرى كۇشەيتىلگەن رەجيمدە جۇمىس ىستەپ، جول قوزعالىسىن رەتتەۋ ءۇشىن قيىلىستارعا شىقتى.
جارىقتىڭ جاپپاي ءوشۋى الەۋمەتتىك جەلىدە دە قىزۋ تالقىلاندى. كەي قولدانۋشىلار ەلەكتر ءۇزىلىسىن سول كۇنى كەشكە الماتىدا ءوتۋى جوسپارلانعان امەريكالىق رەپەر كانە ۋەستىڭ كونتسەرتىمەن ءازىل-قالجىڭ ارالاس بايلانىستىرىپ ۇلگەردى.
قازىرگى تاڭدا نەگىزگى ەلەكترمەن جابدىقتاۋ جۇيەسى قالپىنا كەلتىرىلىپ، ماماندار اپاتتىڭ سالدارىن جويۋ جۇمىستارىن اياقتادى.
