اقش پرەزيدەنتى دونالد ترامپ The New York Times گازەتىنە بەرگەن سۇحباتىندا كونگرەسكە وتكەن ارالىق سايلاۋ ناتيجەلەرىن مويىنداۋعا جانە دەموكراتيالىق پارتيا وكىلدەرىمەن جۇمىس ىستەۋگە دايىن ەكەنىن مالىمدەدى، دەپ حابارلايدى «ادىرنا» ءتىلشىسى.
«مەن بۇل ناتيجەلەردى ءسوزسىز مويىنداۋعا دايىنمىن. ءبىز دەموكراتتارمەن جۇمىس ىستەيمىز جانە ولارمەن ىنتىماقتاستىقتى باستاۋدى اسىعا كۇتەمىز»، – دەدى ترامپ.
3 قاراشادا وتكەن كونگرەسكە ارالىق سايلاۋدىڭ قورىتىندىسىنا سايكەس، دەموكراتتار وكىلدەر پالاتاسىنداعى باقىلاۋدى رەسپۋبليكاشىلداردان تارتىپ الۋى مۇمكىن.
امەريكالىقتار وكىلدەر پالاتاسىنىڭ بارلىق 435 مۇشەسىن جانە سەناتتىڭ 35 مۇشەسىن سايلاعان. دەموكراتتارعا تومەنگى پالاتاداعى ورىن سانىن قازىرگى 214-تەن 218-گە دەيىن ارتتىرۋ جەتكىلىكتى. ال رەسپۋبليكاشىلدار جوعارعى پالاتاداعى باقىلاۋدى ساقتاپ قالۋ ءۇشىن ءۇش ورىننان ارتىق جوعالتپاۋى كەرەك.
اق ءۇي وكىلى رەسپۋبليكالىق پارتيانىڭ سايلاۋداعى ناتيجەسىن بيۋللەتەندەردە دونالد ترامپتىڭ ەسىمى بولماعانىمەن بايلانىستىردى. ونىڭ ايتۋىنشا، ترامپتىڭ جاقتاستارى ول ءوزى سايلاۋعا تۇسكەن كەزدە داۋىس بەرۋگە بەلسەندىرەك قاتىسادى.
