12 قازان كۇنى سەمەي قالاسىندا العاش رەت قالا اكىمىن سايلاۋ ءوتتى. بۇل - ەل تاريحىنداعى ماڭىزدى وقيعا.
سايلاۋ كۇنى سەمەيدە 128 سايلاۋ ۋچاسكەسى جۇمىس ىستەدى. بارلىق ۋچاسكە تاڭعى ساعات 7:00-دە اشىلىپ، كەشكى 20:00-دە جابىلدى. ودان كەيىن بىردەن بيۋللەتەندەردى ساناۋ باستالدى.
ءتيىستى اۋماقتىق سايلاۋ كوميسسياسىنىڭ دەرەگىنشە، سەمەي قالاسىنىڭ سايلاۋشىلار تىزىمىندە 220 مىڭنان استام ازامات تىركەلگەن. ونىڭ ىشىندە 1200-دەن استامى – مۇمكىندىگى شەكتەۋلى جاندار. بارلىق ازاماتتىڭ تەڭدەي قاتىسۋىن قامتاماسىز ەتۋ ءۇشىن ۋچاسكەلەردە ەرىكتىلەر جۇمىس ىستەدى، ارنايى پاندۋستار مەن جەكە داۋىس بەرۋ كابينالارى ۇيىمداستىرىلدى.
ءاربىر كانديداتقا ۇگىت-ناسيحات جۇمىستارىن جۇرگىزۋ ءۇشىن بيۋدجەتتەن 850 مىڭ تەڭگە ءبولىندى. بۇل قاراجات اقپاراتتىق ماتەريالدار (باننەرلەر، پاراقشالار، ستەندتەر) دايىنداۋعا جانە ورنالاستىرۋعا جۇمسالدى.
سايلاۋ كۇنى سەمەيلىكتەردىڭ بەلسەندىلىگى جوعارى بولدى. قالا تۇرعىندارى بۇل ساياسي وقيعانى وزدەرىنىڭ بولاشاعىنا اسەر ەتەتىن ماڭىزدى قادام رەتىندە قابىلدادى.
بەلگىلى سپورتشى، «قازاقستان بارىسى» ءتۋرنيرىنىڭ جەڭىمپازى ەراسىل قاجىباەۆ داۋىس بەرىپ، بۇل ءساتتىڭ تاريحي ماڭىزىن اتاپ ءوتتى:
ء«اربىر ازاماتتىڭ داۋسى - قالانىڭ بولاشاعىنا قوسقان ۇلەسى. بۇگىن مەن دە ءوز تاڭداۋىمدى جاسادىم. سەمەيدىڭ جارقىن كەلەشەگى ءۇشىن ءار تۇرعىن بەلسەندىلىك تانىتۋى قاجەت»، - دەدى ول.
«AMANAT» پارتياسىنىڭ اباي وبلىستىق فيليالىنىڭ توراعاسى ايدار سادىرباەۆ تا بۇل سايلاۋعا ۇلكەن ءمان بەرىپ، داۋىس بەردى.
«بۇعان دەيىن دە اكىمدەر تاعايىندالعان، ءبىز ولاردىڭ ەڭبەگىنە باعا بەرۋدەن اۋلاقپىز. دەگەنمەن بۇل كۇن – ەل تاعدىرىنداعى ماڭىزدى ءارى جاۋاپتى كەزەڭ. سەمەيلىكتەر وزدەرىنىڭ قالا باسشىسىن تىكەلەي سايلاپ، ەرتەڭ اكىممەن ەتەنە جۇمىس ىستەۋگە، ءوڭىردىڭ وركەندەۋىنە ۇلەس قوسۋعا ناقتى مۇمكىندىك الىپ وتىر. مەن دە ءوز ازاماتتىق بورىشىمدى ورىنداپ، سايلاۋ ۋچاسكەسىنە كەلىپ، داۋىس بەردىم»، - دەدى سپيكەر.
سەمەي قالاسى اكىمىن تىكەلەي سايلاۋ - ەلىمىزدە جۇرگىزىلىپ جاتقان ساياسي رەفورمالاردىڭ ناقتى ناتيجەسى. بۇل باستاما «حالىق ۇنىنە قۇلاق اساتىن مەملەكەت» تۇجىرىمداماسىن جۇزەگە اسىرۋدىڭ ايقىن كورىنىسى بولىپ وتىر.
داۋىس ساناۋ جۇمىستارى جالعاسۋدا، رەسمي ناتيجەلەر جاقىن كۇندەرى جاريالانادى. دەگەنمەن قازىردىڭ وزىندە سايلاۋ ەل دەموكراتياسىنىڭ دامۋى مەن ازاماتتاردىڭ ساياسي مادەنيەتىنىڭ ارتا تۇسكەنىن كورسەتەتىن ماڭىزدى وقيعا ەكەنى انىق.
سەمەي تاعى دا ءوز مارتەبەسىن - تۇڭعىشتار قالاسى ەكەنىن دالەلدەدى. قالا اكىمىن تىكەلەي سايلاۋ بۇل - تەك ساياسي رەفورمانىڭ ناتيجەسى ەمەس، سونىمەن قاتار قوعام مەن بيلىك اراسىنداعى ءوزارا سەنىمنىڭ جاڭا كەزەڭى.
