پاۆلودار اكىمى ەرجان يمانزايپوۆتى قىزمەتىنەن بوسادى. بۇل تۋرالى پاۆلودار وبلىسى اكىمىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
اقپارات بويىنشا، ول قاراماعىنداعىلار اراسىندا سىبايلاس جەمقورلىقتىڭ الدىن الۋ بويىنشا ءتيىستى جۇمىس جۇرگىزبەگەن.
پاۆلودار وبلىسىنىڭ اكىمى اسايىن بايحانوۆ پاۆلودار قالاسىنىڭ اكتيۆىمەن كەزدەسۋ وتكىزىپ، ونىڭ قورىتىندىسى بويىنشا قىزمەتكەرلەرى اراسىندا سىبايلاس جەمقورلىقتىڭ الدىن-الۋ جانە ەسكەرتۋ جۇمىستارىنىڭ تيىسىنشە ۇيىمداستىرىلماۋىنا، قالا تۇرعىندارى ءۇشىن وبلىس ورتالىعىن دامىتۋ جانە اباتتاندىرۋ جونىندەگى ماڭىزدى جوبالاردىڭ ىسكە اسىرىلۋىنا قاجەتتى باقىلاۋدىڭ بولماۋىنا، قالا اكىمدىگىنىڭ پاۆلودار قالاسىنىڭ تۇرعىندارىمەن كوممۋنيكاتسياسىنىڭ السىرەۋىنە بايلانىستى پاۆلودار قالاسىنىڭ اكىمى ەرجان يمانزايپوۆتى لاۋازىمىنان بوساتۋ تۋرالى شەشىم قابىلدانعانىن مالىمدەدى، - دەپ جازىلعان پاۆلودار وبلىسى اكىمىنىڭ ءباسپاسوز قىزمەتى جىبەرگەن حابارلامادا.
وبلىس اكىمىنىڭ اپپاراتىنا پرەزيدەنت اكىمشىلىگىنە ءتيىستى ۇسىنىس ەنگىزۋ تاپسىرىلدى.
ايتا كەتەيىك، ەرجان يمانزايپوۆ قالا اكىمى قىزمەتىنە 2022 جىلدىڭ سوڭىندا تاعايىندالعان ەدى.
