پاۆلوداردا جەكە ۇيدەن ءورت شىعىپ، ءبىر جاسار ءسابي قازا تاپتى

2647
Adyrna.kz Telegram

پاۆلوداردا 2 قاباتتى ۇيدەن ءورت شىعىپ، سالدارىنان 1 جاسار بالا كوز جۇمدى. بۇل تۋرالى وبلىستىق توتەنشە جاعدايلار دەپارتامەنتى مالىمدەدى، دەپ حابارلايدى “ادىرنا” ءتىلشىسى.

وبلىستىق توتەنشە جاعدايلار دەپارتامەنتىنىڭ مالىمەتىنشە، 10 جەلتوقساندا ساعات 17.57-دە 101 پۋلتىنە ءورت تۋرالى حابارلاما تۇسكەن. ءورت پاۆلودار قالاسى، ۋسولسكي ىقشاماۋدانىندا 2 قاباتتى كىرپىشتەن قالانعان جەكە تۇرعىن ۇيدەن شىققان.

“وقيعا ورنىنا بارعان كەزدە ءۇيدىڭ 1-قاباتىنداعى حوللدا 4 شارشى مەتر اۋماقتا 2 ورىندىق، كىلەم، ەكىنشى قاباتقا اپاراتىن اعاش باسپالداق جانىپ كەتكەنى انىقتالدى. بارلاۋ كەزىندە زالدان كۇيگەن بالانىڭ ءمايىتى تابىلدى (2021 جىلى تۋعان ۇل بالا)”، – دەلىنگەن حابارلامادا.

ۇيدە 5 جاسار ۇل مەن 14 جاسار قىز بالا بولعانى بەلگىلى بولدى، دارىگەرلەر ولارعا «كۇيزەلىسكە ءتۇسۋ»دياگنوزىن قويعان.

ءورت 18 ساعات 47 مينۋتتا جويىلدى. ءورتتى سوندىرۋگە 5 بىرلىك تەحنيكا مەن 16 ادام جۇمىلدىرىلدى.

تجد قىزمەتكەرلەرى بالالاردى ەرەسەكتەردىڭ قاراۋىنسىز قالدىرماۋدى ەسكەرتەدى.

پىكىرلەر